অসম লোকসেৱা আয়োগৰ সংযুক্ত অসামৰিক সেৱাৰ পৰীক্ষাসমূহ (মূল) কাইলৈৰ পৰা অনুষ্ঠিত হ’ব৷ ইতিমধ্যে ৰাজ্যখনৰ কেইবা হাজাৰ মেধা ছাত্ৰ-ছাত্ৰী এই পৰীক্ষাৰ বাবে সাজু হৈছে৷ পৰীক্ষাসমূহ কোনো সমস্যা তথা বিতৰ্ক অবিহনে অনুষ্ঠিত কৰিবলৈ অসম লোকসেৱা আয়োগ কৰ্তৃপক্ষই বিভিন্ন ব্যৱস্থা লোৱা বুলি জানিব পৰা গৈছে৷

মুখ্যমন্ত্ৰী হিমন্ত বিশ্ব শৰ্মাই পৰীক্ষাৰ্থীসকলক শুভেচ্ছা জ্ঞাপন কৰিছে৷ আনহাতে মুখ্যমন্ত্ৰীয়ে প্ৰথমবাৰ ইংৰাজীৰ লগতে অসমীয়াত পৰীক্ষা অনুষ্ঠিত হ’ব বুলি কৈ এয়া ভাল খবৰ বুলি অভিহিত কৰে৷

সামাজিক মাধ্যমত পোষ্ট দি মুখ্যমন্ত্ৰীয়ে কয় ‘‘অসম লোকসেৱা আয়োগৰ সংযুক্ত প্ৰতিযোগিতামূলক পৰীক্ষাৰ মেইনছ্ কাইলৈৰ পৰা আৰম্ভ হ’ব। ভাল লগা কথা যে আমাৰ চৰকাৰৰ নিৰ্দেশনাৰ বাবে এই পৰীক্ষাত প্ৰথমবাৰৰ বাবে প্ৰতিটো প্ৰশ্ন ইংৰাজীৰ উপৰি অসমীয়া ভাষাতো থাকিব৷ এই ঐতিহাসিক পদক্ষেপৰ বাবে অসম লোকসেৱা আয়োগলৈ আন্তৰিক কৃতজ্ঞতা জ্ঞাপন কৰিলো। লগতেসমূহ পৰীক্ষাৰ্থীলৈ শুভেচ্ছা জ্ঞাপন কৰিলো৷’’ ৰাজ্য চৰকাৰৰ নিৰ্দেশ অনুসৰি অসমীয়া ভাষা সংযোজন কৰা হৈছে অসম লোকসেৱা আয়োগৰ পৰীক্ষাত।”