ভাৰত-ম্যানমাৰ আন্তঃৰাষ্ট্ৰীয় সীমান্তত কাঁইটীয়া তাঁৰ স্থাপন, ফ্ৰী মুভমেণ্ট ৰেজিম (এফএমআৰ) মূল ৰূপত পুনৰ প্ৰৱৰ্তন নকৰা আৰু নাগালেণ্ডত সংৰক্ষিত এলেকা অনুমতি (পিএপি) ব্যৱস্থাৰ বিৰুদ্ধে বুধবাৰে ৰাজপথলৈ ওলাই আহিল শতাধিক নগা। কোহিমাৰ পুৰণি বিধায়ক জংচনত অনুষ্ঠিত এই প্ৰতিবাদী জনসভাত অংশগ্ৰহণ কৰে শতাধিক লোকে। উল্লেখ্য যে এই প্ৰতিবাদী কাৰ্যসূচীৰ নেতৃত্ব দিয়ে অংগামী পাব্লিক অৰ্গানেইজেশ্যন (এপিঅ’) আৰু অন্যান্য নগা গোটে। প্ৰতিবাদৰ অন্তত ৰাজ্যপালৰ জৰিয়তে এপিঅ’ আৰু অন্যান্য সংগঠনে কেন্দ্ৰীয় গৃহমন্ত্ৰী অমিত শ্বাহক এখন স্মাৰক-পত্ৰ প্ৰদান কৰে। এই স্মাৰক-পত্ৰত কেন্দ্ৰৰ শেহতীয়া সীমান্ত নীতিক ‘স্থানীয় নগা জনসাধাৰণৰ অস্তিত্ব আৰু অধিকাৰৰ প্ৰতি ভাবুকি বুলি অভিহিত কৰে প্ৰতিবাদীসকলে। স্মাৰক-পত্ৰখনত কোৱা হৈছে, “এতিয়া নগা জনসাধাৰণে সীমান্ত পাৰ হৈ গৃহভূমিলৈ যাবলৈ বাধ্য হৈছে, যিটো নিজৰ ঘৰলৈ যোৱাৰ অনুমতিৰ সমান। এই নতুন ব্যৱস্থাৰ ফলস্বৰূপে সীমান্ত জিলাৰ বাসিন্দাসকলে অসহ্যকৰ পৰিস্থিতিৰ সন্মুখীন হৈছে।” নগা সংগঠনসমূহে দাবী কৰে যে কাঁইটীয়া তাঁৰৰ বেৰেৰে নিজৰ ঐতিহাসিক ভূখণ্ড ভাগ কৰাটো জনজাতিৰ অধিকাৰ খৰ্ব কৰা। তেওঁলোকৰ ভাষাত “সীমান্তত বেৰ দি মানুহ আৰু মাটি বিভাজিত কৰাৰ পদক্ষেপ আমাৰ অধিকাৰৰ প্ৰত্যক্ষ বিৰোধী।” সংগঠনকেইটাই পূৰ্বৰ দৰে ভাৰত-ম্যানমাৰ সীমান্তত সম্পূৰ্ণ ফ্ৰী মুভমেণ্ট ৰেজিম প্ৰৱৰ্তনৰ দাবী জনাইছে। তেওঁলোকৰ মতে, ঐতিহাসিক আৰু সাংস্কৃতিক অধিকাৰক সন্মান জনোৱা আৰু স্পৰ্শকাতৰ সীমান্ত অঞ্চলত যথাৰ্থ অৱস্থা বজাই ৰখাৰ ক্ষেত্ৰত এফএমআৰ অতি গুৰুত্বপূৰ্ণ। ইয়াৰ সমান্তৰালকৈ নাগালেণ্ডৰ পৰা পিএপি আৰু আৰএপি প্ৰত্যাহাৰৰ দাবীও উত্থাপন হৈছে। সংগঠনসমূহৰ মতে, পিএপি আৰু সীমান্ত পাৰ হোৱা ব্যৱস্থাৰ যৌথ ৰূপায়ণত এটা লুকাই থকা “ষড়যন্ত্ৰ” আছে, যাৰ জৰিয়তে “কোনো দোষৰ অভাৱতো নগা জনসাধাৰণৰ বিৰুদ্ধে আইন-শৃংখলাহীনতা সংঘটিত কৰিব পাৰি।” লগতে দাবী কৰে যে যদি পিএপি বাধ্যতামূলক কৰা হয় তেন্তে বিদেশী পৰ্যটকৰ প্ৰৱেশ কাৰ্যতঃ বন্ধ হৈ যাব, যাৰ প্ৰভাৱ নাগালেণ্ডৰ সমৃদ্ধিশালী পৰ্যটন উদ্যোগত পৰিব। পৰ্যবেক্ষকসকলৰ মতে নগা জনগোষ্ঠীৰ এই প্ৰতিবাদ কেন্দ্ৰৰ সীমান্ত আৰু অনুপ্ৰৱেশ নীতিৰ বিৰুদ্ধে খিলঞ্জীয়াৰ অধিকাৰ সুৰক্ষাৰ এক শক্তিশালী বাৰ্তা।