২২ জুলাইৰ পৰা নিৰুদ্দেশ হৈ থকা অসমীয়া সংগীত জগতৰ নক্ষত্ৰ তথা বিশিষ্ট সংগীত পৰিচালক ৰমেন বৰুৱাক লৈ পুনৰ মন্তব্য কৰিছে মুখ্যমন্ত্ৰী ড০ হিমন্ত বিশ্ব শৰ্মাই৷ ২২ জুলাইত লতাশিলৰ গণেশ মন্দিৰলৈ যাম বুলি ঘৰৰ পৰা ওলাই গৈ নিৰুদ্দেশ হৈ থকা ৰমেন বৰুৱাক লৈ মুখ্যমন্ত্ৰীয়ে তাৎপৰ্যপূৰ্ণ মন্তব্য প্ৰদান কৰিছে৷

ড০ হিমন্ত বিশ্ব শৰ্মাই কয় যে ৰমেন বৰুৱা ব্ৰহ্মপুত্ৰৰ নদীলৈ যোৱাৰ প্ৰমাণ আছে৷ উভতি অহাৰ প্ৰমাণ নাই। যদি কোনোবা নদীলৈ গৈ ঘূৰি নাহে, তেন্তে সকলো নিয়তিৰ পৰিহাস বুলি মানি লোৱা উচিত। উচ্চ ন্যায়লয়ৰ অধিবক্তাৰ সৈতে কথা পাতিছো, তেওঁ নদীলৈ গৈছে, কিন্তু ঘূৰি অহা নাই। পুৱাৰ ভাগত প্ৰচণ্ড মানসিক চাপ পাইছিল, যাৰ বাবে তেওঁ নদীলৈ গুচি গৈছিল।

উল্লেখ্য যে, তিনিটা দিন অতিক্ৰমী গ’ল যদিও আজিও সন্ধান ওলোৱা নাই সংগীত পৰিচালক ৰমেন বৰুৱাৰ৷ স্বনামধন্য সংগীত পৰিচালকজন নিৰুদ্দেশ হোৱাৰ ঘটনাক অসমীয়া সমাজে সহজে ল’ব পৰা নাই৷ দিনে-নিশাই অভিযান চলােৱাৰ পাছতো ৰমেন বৰুৱাৰ কোনো শুংসূত্ৰ উদ্ধাৰ হোৱা নাই৷ প্ৰকৃততে নদীত জাপ দিলে নে পিছলি পৰিল নে অন্য ঠাইত আছে সেয়া স্পষ্ট কৰিব পৰা নাই আৰক্ষীয়ে৷ সময় পাৰ হৈ যোৱাৰ লগে লগে পৰিয়াল, অসমবাসী উদ্বিগ্ন হৈছে৷ অসমবাসীয়ে তেখেতক সুস্থ শৰীৰে উভতি অহাৰ কামনা কৰিছে৷ ব্ৰহ্মপুত্ৰৰ পানীৰ কাষলৈ ৰমেন বৰুৱা নামি যোৱাৰ তথ্য পােৱা বুলি কৈছে আৰক্ষীয়ে। কিন্তু উভতি অহাৰ কোনো তথ্য নাই আৰক্ষীৰ হাতত। আৰক্ষীৰ স্নিফাৰ ডগে ব্ৰহ্মপুত্ৰৰ পানীৰ যুৱলিলৈ গৈছে।