উপ-নিৰ্বাচন আৰু পঞ্চায়ত নিৰ্বাচনত বিজয় নিশ্চিত কৰাৰ লক্ষ্য লৈ তৎপৰ হৈছে বিজেপিৰ সহযোগী আঞ্চলিক দল অসম গণ পৰিষদ৷ আজি দলটোৰ সভাপতি অতুল বৰাৰ পৌৰাহিত্যত আমবাৰীস্থিত দলৰ মুখ্য কাৰ্যালয়ত বৰ্ধিত কাৰ্যনিৰ্বাহক সভা অনুষ্ঠিত হয়৷ সভাত কাৰ্যকৰী সভাপতি কেশৱ মহন্ত, দলৰ উপ-সভাপতিসকল, সাধাৰণ সম্পাদক আৰু সম্পাদকসকল, কেন্দ্ৰীয় সমিতিৰ বিষয়-ববীয়াসকল, জিলা সমিতিসমূহৰ সভাপতিসকল আৰু ভাতৃ-ভগ্নী পৰিষদসমূহৰ সভাপতি আৰু বিষয়-ববীয়াসকল উপস্থিত থাকে।

জানিব পৰা মতে, এই সভাত উপ-নিৰ্বাচন আৰু পঞ্চায়ত নিৰ্বাচন সন্দৰ্ভত আলোচনা কৰা হয়৷ দলৰ নেতা-কৰ্মীক পূৰ্ণোদ্যমে সাংগঠনিক কাম-কাজত মনোনিবেশ কৰিবলৈ আহ্বান জনাই অতুল বৰাই। কেন্দ্ৰ আৰু ৰাজ্য চৰকাৰৰ জনহিতৈষী আঁচনিক লৈ জনসজাগতা সৃষ্টি কৰাৰ ক্ষেত্ৰত কাম কৰিবলৈ দলৰ নেতা-কৰ্মীক আহ্বান জনাই সভাপতি বৰাই৷