ৰাজ্যৰ ৰাজধানী গুৱাহাটী মহানগৰীত পুনৰ সংঘটিত হৈছে ভয়ংকৰ ঘটনা৷ একেটা পৰিয়ালৰ তিনিগৰাকী লোকৰ মৃতদেহ এটা বন্ধ কোঠাত উদ্ধাৰৰ ঘটনাই চাঞ্চল্যৰ সৃষ্টি কৰিছে৷ গুৱাহাটীৰ বামুণীমৈদামৰ অমৰ সংঘ পথত ৰে’লৱে কলনিৰ এটা বন্ধ কোঠাত এগৰাকী মহিলা, এগৰাকী কিশোৰী আৰু এজন পুৰুষৰ মৃতদেহ ৰহস্যজনক অৱস্থাত উদ্ধাৰ হয়৷ আটাইকেইগৰাকী মৃতদেহ একেটা পৰিয়ালৰ৷ পিতৃ, মাতৃ আৰু কন্যা বুলি জানিব পৰা গৈছে৷ মৃতদেহ তিনিটা লোহিত ঠাকুৰীয়া, পত্নী জুলি ডেকা আৰু জীয়ৰী ঋত্বিকা ডেকাৰ বুলি জানিব পৰা গৈছে৷ আজি দুপৰীয়া পৰিয়ালটোৰ কোনো লোক ঘৰৰ পৰা ওলাই নহাত ওচৰ-চুবুৰীয়াই খিৰিকিৰে কোঠাৰ ভিতৰলৈ চোৱাত কন্যাৰ মৃতদেহ ওলমি থকা প্ৰত্যক্ষ কৰিছিল তাৰ পিছতে আৰক্ষীক খবৰ দিয়া হয়৷ কাৰ্যবাহী দণ্ডাধীশৰ উপস্থিতিত আৰক্ষীয়ে তিনিটা মৃতদেহ প্ৰত্যক্ষ কৰিছে৷ আৰক্ষীয়ে প্ৰাথমিক তদন্ত কৰি লোহিত ঠাকুৰীয়াই পত্নী আৰু কন্যাক হত্যা কৰি নিজে আত্মহনন কৰাৰ সন্দেহ কৰিছে৷ ইতিমধ্যে আৰক্ষীয়ে তিনিটা মৃতদেহ উদ্ধাৰ কৰি মৰণোত্তৰ পৰীক্ষাৰ ব্যৱস্থা কৰিছে৷ আৰক্ষীয়ে ঘটনাৰ তদন্ত আৰম্ভ কৰি কেইবাটাও তথ্য লাভ কৰিছে৷ লোহিত ঠাকুৰীয়াৰ সৈতে পত্নী আৰু কন্যাৰ সংঘাত আছিল৷ কন্যাৰ সৈতে অপকৰ্ম কৰিব খোজাৰ অভিযোগত জেললৈ গৈছিল ঠাকুৰীয়া৷