একাংশ বৈদ্যুতিক আৰু ছপা সংবাদ মাধ্যমত সংযুক্ত মুক্তি বাহিনী স্বাধীনে অৰুণাচল প্ৰদেশৰ কানি খেতিয়কসকলৰ পৰা ধন দাবী কৰা বুলি বাতৰি ওলোৱাৰ পিছত সংগঠনটোৱে আজি প্ৰতিক্ৰিয়া ব্যক্ত কৰি বিবৃতি প্ৰকাশ কৰিছে৷ সংযুক্ত মুক্তি বাহিনী স্বাধীনৰ প্রচাৰ বিভাগৰ সহঃ সম্পাদক ঈশান অসমে জাৰি কৰা বিবৃতিত ধন দাবী কৰাৰ অভিযোগ সম্পূৰ্ণৰূপে অস্বীকাৰ কৰিছে। সংগঠনটোৰ তৰফৰ পৰা এক বিবৃতিত স্বষ্ট কৰে যে আলফা স্বাধীনে মানৱ সমাজত ব্যাধি সৃষ্টিকাৰী কোনো কাৰ্যৰ সৈতে কেতিয়াও জড়িত হোৱা নাই আৰু ভৱিষ্যততো নহ’ব। সংযুক্ত মুক্তি বাহিনী স্বাধীনে কঠোৰ ভাষাত কৈছে যে নিচাজাতীয় দ্ৰব্যৰ সেৱন আৰু সৰবৰাহৰ বিৰুদ্ধে তেওঁলোকে জন্মলগ্নৰে পৰা কঠোৰ স্থিতি পালন কৰি আহিছে। সংগঠনটোৱে এই সন্দৰ্ভত আগতে ৰাইজক অৱগত কৰি আহিছে বুলি কৈছে। বিবৃতিত উল্লেখ কৰা হৈছে, “আমাৰ সংগঠনে আফিং খেতিয়কৰ পৰা আৰ্থিক অনুদান সংগ্ৰহ কৰাৰ কোনো অৱকাশেই নাই।” সংগঠনটোৱে এই অভিযোগক শত্ৰুপক্ষৰ অপপ্ৰচাৰ বুলি অভিহিত কৰিছে। তেওঁলোকে কৈছে যে সংগঠনৰ বৰ্দ্ধিত পৰিসৰত আতংকিত হৈ শত্ৰুপক্ষই তেওঁলোকক থলগিৰি ৰাইজৰ মানসপটত হেয় প্ৰতিপন্ন কৰিবলৈ এনে অপপ্ৰচাৰ চলাইছে। সংগঠনটোৱে ৰাইজক শত্ৰুপক্ষৰ এনে অপপ্ৰচাৰত পতিয়ন নাযাবলৈ আহ্বান জনাইছে। সংযুক্ত মুক্তি বাহিনী স্বাধীনে এই অপপ্ৰচাৰৰ প্ৰতি গুৰুত্ব আৰোপ কৰি কৈছে যে তেওঁলোকে সদায়ে মানৱ কল্যাণৰ বাবে কাম কৰি আহিছে আৰু ভৱিষ্যততো কৰি থাকিব। তেওঁলোকে ৰাইজক সংগঠনৰ সঠিক তথ্যৰ ওপৰত ভিত্তি কৰি সিদ্ধান্ত ল’বলৈ অনুৰোধ জনাইছে।