গুৱাহাটীঃ অসমৰ বাহিৰত থাকি কিদৰে দেখিব অসমৰ সাম্প্ৰতিক উন্নয়নৰ ছবি। – আলফা স্বাধীনৰ সেনাধ্যক্ষ পৰেশ বৰুৱাক এই প্ৰশ্ন কৰি অসমৰ ক্ষতি কৰিব পৰা কোনো ধৰণৰ কামৰ পৰা বিৰত থাকিবলৈ সকিয়নী প্ৰদান কৰিছে অসম আৰক্ষীৰ সঞ্চালকপ্ৰধান জি পি সিঙে।
অসমৰ ক্ষতি কৰিব পৰা অপশক্তিৰ বিৰুদ্ধে অসম আৰক্ষীয়ে ব্যৱস্থা গ্ৰহণ কৰিব বুলি মন্তব্য কৰি ডিজিপি জি পি সিঙে প্ৰৰোচনা বা উচতনিত বেয়া কাম নকৰিবলৈ নৱ প্ৰজন্মকো আহ্বান জনায়। তেওঁ লগতে সকিয়াই দিয়ে যে বেয়া কাম কৰিলে শাস্তিৰ সন্মুখীন হ’ব লাগিব।
উল্লেখ্য যে, ১৫ আগষ্টৰ দিনটোত ৰাজ্যৰ ২৫টা ভিন্ন স্থানত বোমা সংস্থাপন কৰাৰ কথা সদৰী কৰিছিল আলফা স্বাধীনে। আলফাই এক বিবৃতিযোগে বোমা সংস্থাপন কৰা ঠাইসমূহ ৰাজহুৱা কৰাৰ পিছতহে এই বোমা সংস্থাপনৰ বিষয়ে জানিব পাৰে আৰক্ষীয়েও। এনে পৰিপ্ৰেক্ষিতত আৰক্ষী আৰু ৰাজ্যৰ গৃহ বিভাগৰ ব্যৰ্থতাক লৈ চৰ্চা হৈছে সামাজিক মাধ্যমতো।
এই সন্দৰ্ভত প্ৰতিক্ৰিয়া দি জি পি সিঙে কয় যে শেহতীয়া ঘটনাক লৈ অসম আৰক্ষীয়ে অসহায়বোধ কৰা নাই৷ অসম আৰক্ষী ব্যৰ্থ হোৱা নাই বুলি মন্তব্য কৰে ডিজিপি সিঙে। আগন্তুক ৫০ বছৰৰ অসমৰ উন্নয়নক লৈ অসম আৰক্ষী সচেষ্ট বুলি কয় জি পি সিঙে।
উল্লেখযোগ্য যে, তেজপুৰ বিশ্ববিদ্যালয়ত আজি অনুষ্ঠিত দীক্ষান্ত সমাৰোহত মুখ্য অতিথিৰূপে উপস্থিত থাকে অসম আৰক্ষীৰ সঞ্চালকপ্ৰধানগৰাকী৷ জি পি সিঙে ছাত্ৰ-ছাত্ৰীৰ সৈতে এক অন্তৰংগ বাৰ্তালাপতো মিলিত হয়৷