Brahmaputra Times
গুৱাহাটীঃ ব্লেক মাৰ্টেকত গেছ চিলিণ্ডাৰ সৰবৰাহৰ অভিযোগত সোমবাৰে গ্ৰেপ্তাৰ কৰা হৈছে অসম আৰক্ষী ৰেডিঅ’ অৰ্গেনাইজেশ্যনৰ এজন কনিষ্টবলক।
ধেমাজি আৰক্ষীৰ অভিযানৰ অন্তত ধেমাজিৰ নাগাখেলিয়াত থকা বাসগৃহৰ পৰা গ্ৰেপ্তাৰ কৰে বৰ্তমান জোনাইত কৰ্মৰত দিগন্ত তামুলী নামৰ কনিষ্টবলজনক।
এই অভিযানত তামুলীৰ ঘৰৰ পৰা ৮৬টা গেছ চিলিণ্ডাৰ জব্দ কৰাৰ পিছতে তেওঁৰ বিৰুদ্ধে চোৰাং ব্যৱসায়ত জড়িত থকাৰ অভিযোগ স্পষ্ট হৈ পৰে।
অভিযোগ উত্থাপন হৈছিল যে তামুলীয়ে স্থানীয় গেছ এজেন্সীৰ সৈতে গোপন বুজাবুজি কৰি এল পি জি চিলিণ্ডাৰ অতিৰিক্ত মূল্যত বিক্ৰী কৰিছিল।
গ্ৰেপ্তাৰৰ পিছত তামুলীক কৰ্তব্যৰ পৰা নিলম্বন কৰা হয়, আৰু চোৰাং ব্যৱসায়ৰ ৰেকেটৰ সৈতে তেওঁৰ সম্পৰ্কৰ বিষয়ে জানিবলৈ পুংখানুপুংখ তদন্ত আৰম্ভ কৰা হৈছে।
