অগপই উজনি অসমত নেতাসকলক শক্তিশালী কৰাৰ লগতে দলৰ সাংগঠনিক ভেটি শক্তি কৰিবলৈ প্ৰথম প্ৰয়াসত নতুন আৰু পুৰণি নেতাক একেখন পতাকাৰ তলত একত্ৰিত কৰি পূৰ্বৰ সেই আবেগ পুনৰ ৰাইজৰ মাজলৈ নিব খুজিছে৷ অসম আন্দোলন, ৮৫৫ জন শ্বহীদৰ ত্যাগক সাৰথি কৰি অগপই পুনৰ ৰাইজৰ মাজলৈ যাবৰ বাবে কঁকালত টঙালী বান্ধিছে৷ প্ৰথম পদক্ষেপ হিচাপে উজনি অসমত অনুষ্ঠিত কৰিছে কেন্দ্ৰীয়  প্ৰতিষ্ঠা দিৱস৷ বিগত কেইবাটাও দিন ধৰি উজনিলৈ কেন্দ্ৰীয় নেতাৰ আহ-যাহ বৃদ্ধি হৈছে৷ মূল লক্ষ্য হৈছে ২০২৬ চন৷ ২০২৪ চনৰ নিৰ্বাচনৰ দৰে ২০২৬ চনৰ বিধানসভা নিৰ্বাচনত যাতে উজনি অসমৰ নিৰ্বাচনী প্ৰচাৰৰ দায়িত্বত উজনি অসমৰ নেতা শূন্য নহয় তাৰ প্ৰতি লক্ষ্য ৰাখি কেন্দ্ৰীয় প্ৰতিষ্ঠা দিৱস অনুষ্ঠিত কৰা হৈছে৷ পুৱা ডিব্ৰুগড় জিলাৰ চাবুৱাৰ জেৰাইত পুৱা প্ৰভাতী আৰু পতাকা উত্তোলনৰ পাছতে কেন্দ্ৰীয় প্ৰতিষ্ঠা দিৱসৰ কাৰ্যসূচী আৰম্ভ হ’ব৷ ৯:৩০ বজাত শ্বহীদ তৰ্পণ, ১০ বজাত সতীৰ্থ সোঁৱৰণ, ১১ বজাত সাংস্কৃতিক শোভাযাত্ৰা, দিনৰ ১২ বজাত মুকলি সভা, সন্ধা ৫ বজাত বন্তি প্ৰজ্বলন কৰা হ’ব। মুকলি সভাত অসম গণ পৰিষদৰ সভাপতি অতুল বৰা, কাৰ্যকৰী সভাপতি কেশৱ মহন্তৰ লগতে কেন্দ্ৰীয় নেতৃত্ব উপস্থিত থাকিব। তিনিদিন পূৰ্বে স্থানীয় বিধায়ক পোনাকণ বৰুৱাই এখন সংবাদমেল সম্বোধন কৰি দলৰ ইতিহাস বৰ্ণনা কৰি কেইবাটাও দিশ স্পষ্ট কৰি দিছে৷ অগপই দুবাৰকৈ দিছপুৰত অকলে চৰকাৰ গঠন কৰাৰ কথা দোহাৰিছে৷ তেওঁ অগপ এটা সাধাৰণ দল নহয় বুলি দাবী কৰি ছয় বছৰীয়া অসম আন্দোলনৰ ফলশ্ৰুতিত এই দলৰ জন্ম বুলিও কয়৷ পুলিচ-চিআৰপিএফৰ গুলীত ৮৫৫ জন লোক শ্বহীদ হৈছিল৷ খিলঞ্জীয়া লোক শ্বহীদ হৈছিল৷ হাজাৰ হাজাৰ লোক ঘূণীয়া হৈছিল৷ বাই-ভনী নিৰ্যাতিতা হৈছিল বুলি দাবী কৰি অগপৰ প্ৰতি পূৰ্বে মানুহৰ যি সহানুভূতি আছিল সেই সহানুভূতি উভতাই আনিবলৈ প্ৰয়াস কৰিছে৷