আজি গুৱাহাটীৰ তাজ ভিভাণ্টা হোটেলত ভাৰতীয় খাদ্য সুৰক্ষা আৰু মানক কৰ্তৃপক্ষৰ বিষয়-ববীয়াৰ উপস্থিতিত অসমৰ কেঁচা চাহপাত তথা খাদ্যৰ গুণগত মাণদণ্ড সন্দৰ্ভত বিশেষ বৈঠক অনুষ্ঠিত হয়৷ ভাৰতীয় খাদ্য সুৰক্ষা আৰু মানক কৰ্তৃপক্ষ কাৰ্যবাহী সঞ্চালক ইনোশী শৰ্মাৰ উপস্থিতিত অনুষ্ঠিত বৈঠকত খাদ্য সুৰক্ষা আইন আৰু অসমৰ চাহপাতৰ গুণগত মাণদণ্ড সন্দৰ্ভত আলোচনা কৰা হয়৷ গুৰুত্বপূৰ্ণ বৈঠকত এনইটিএৰ উপদেষ্টা বিদ্যানন্দ বৰকাকতি, এবিএলটিএমএৰ চন্দ্ৰজিৎ বৰুৱা, আশ্লাম খান, টাটা গ্ৰুপৰ পুতুল বৰা, নৰ্থ ইষ্ট কনফেডাৰেচন স্মল টি গ্ৰেয়াৰৰ্ছ এচোছিয়েচনৰ বিনোদ বুঢ়াগোঁহাই, উজনি অসম ক্ষুদ্ৰ চাহ ৰোপণকাৰী সংস্থাৰ দিগন্ত হাজৰিকা, অল বো স্মল টি গ্ৰাৱাৰচ এছ’চিয়েচনৰ তৰুণ মুছাহাৰী আৰু ক্ষুদ্ৰ চাহ খেতিয়কৰ প্ৰতিনিধি উপস্থিত থাকে। বৈঠকত সকলো সংগঠনে নিজ নিজ দাঙি ধৰে। নতুন বছৰৰ আৰম্ভণিৰ পৰা কেঁচা চাহপাতত বিষাক্ত দ্ৰব্য ব্যৱহাৰ কৰা যাতে নহয় তাক লৈ গুৰুত্ব প্ৰদান কৰা হয়৷ চাহ বাগিচা, উদ্যোগৰ সৈতে জড়িত সংস্থাসমূহক ক্ষুদ্ৰ চাহ খেতিয়কৰ মাজত সজাগতা আনিবলৈ অসমৰ প্ৰতিখন জিলাতে সজাগতা সভা অনুষ্ঠিত কৰিবলৈ সিদ্ধান্ত গ্ৰহণ কৰা হয়৷ বৈঠকত প্ৰতিখন জিলাতে কেঁচা চাহপাতৰ পৰীক্ষাগাৰ স্থাপন কৰা জোৰ দিয়া বুলি নৰ্থ ইষ্ট কনফেডাৰেচনৰ সচিব প্ৰধান বিনোদ বুঢ়াগোঁহায়ে জানিবলৈ দিয়ে।