আজি ৰাইজৰ দলে ঘোলাঘাট জিলাত দলটোৰ সভাপতি অখিল গগৈৰ উপস্থিতিত কৰ্মীসভা অনুষ্ঠিত কৰে৷ পঞ্চায়ত আৰু বিধানসভা নিৰ্বাচনক লৈ ৰাজ্যৰ বিভিন্ন প্ৰান্তত কৰ্মী সভা অনুষ্ঠিত কৰি অহা ৰাইজৰ দলে গোলাঘাটত প্ৰথমবাৰ কৰ্মীসভা অনুষ্ঠিত কৰে৷ বিধানসভা নিৰ্বাচনত কিংমেকাৰ হোৱাৰ হুংকাৰ দি অহা অখিল গগৈৰ উপস্থিতিত অনুষ্ঠিত গোলাঘাটৰ কৰ্মীসভাত বহু সংখ্যক লোকে ৰাইজৰ দলত যোগদান কৰে৷ ৰাইজৰ দলে যাতে গোলাঘাট জিলাৰ ৫টা সমষ্টিতে প্ৰতিদ্বন্দ্বিতা কৰিব পাৰে তাৰ বাবে ৰাজনৈতিক আৰু সাংগঠনিক তৎপৰতা গোলাঘাট জিলাত আৰম্ভ কৰা বুলি কয় গগৈয়ে৷ গগৈয়ে কৰ্মী সভাৰ পৰা পুনৰ কংগ্ৰেছক নীতি শিক্ষা দিয়া পৰিলক্ষিত হয়৷ উপ-নিৰ্বাচনৰ পৰা কংগ্ৰেছক শিক্ষা লোৱাৰ আহ্বান জনাই পঞ্চায়ত নিৰ্বাচনত সকলো বিৰোধীক একত্ৰিত হৈ নিৰ্বাচনত অৱতীৰ্ণ হ’বলৈ আহ্বান জনাইছে৷ পঞ্চায়ত নিৰ্বাচন যদি বিৰোধীয়ে একত্ৰিত হৈ খেলে তেন্তে ২০২৬ চনৰ বিধানসভাৰ পূৰ্বে তৃণমূল পৰ্যায়ত বিৰোধী ঐক্য মজবুত হোৱাৰ কথা উল্লেখ কৰিছে গগৈয়ে৷ লগতে বিজেপিক পৰাজিত কৰিব খোজা দলসমূহক এক হোৱাৰ আহ্বান জনাইছে গগৈয়ে৷ অসমৰ সকলো মহিলাকে অৰুণোদয় আঁচনিৰ অন্তৰ্ভুক্ত কৰাৰো দাবী জনায়৷ আজি গোলাঘাট জিলাত শিৱসাগৰৰ বিধায়ক অখিল গগৈয়ে বিশেষ ঘোষণা কৰিছে৷ অখিল গগৈয়ে পুনৰ শিৱসাগৰত নিৰ্বাচন খেলাৰ ঘোষণা কৰিছে৷ ২০২৬ত পুনৰ শিৱসাগৰত নিৰ্বাচন খেলাৰ ঘোষণা কৰে অখিল গগৈয়ে৷