মুখ্যমন্ত্ৰী হিমন্ত বিশ্ব শৰ্মাৰ চৰকাৰৰ ৰোষত পৰিছে প্ৰদেশ কংগ্ৰেছৰ প্ৰাক্তন সভাপতি তথা প্ৰাক্তন সাংসদ ৰিপুন বৰা। যোৰহাটৰ সাংসদ তথা সদ্য নিযুক্ত কংগ্ৰেছ প্ৰদেশ সভাপতিগৌৰৱ গগৈৰ হৈ সদায় সোচ্চাৰ থকা এই জ্যেষ্ঠ নেতাগৰাকীৰ বিৰুদ্ধে পদক্ষেপ ল’বলৈ আগবাঢ়িছে চৰকাৰ।

কংগ্ৰেছ সাংসদ গৌৰৱ গগৈৰ কথিত পাকিস্তান সংযোগ সন্দর্ভত তেওঁ সংবাদমেলত প্ৰতিবাদী স্বৰত মাত মাতিছিল। সংবাদমেলত গগৈৰ পত্নীয়ে পাকিস্তান চৰকাৰৰ পৰা দৰমহা লোৱাৰ কথা উল্লেখ কৰাৰ পাছতেই মুখ্যমন্ত্ৰীৰ বিশেষ সতর্কতা কোষে ৰিপুন বৰাক সমন জাৰি কৰিছে। অসম CID-ৰ গোচৰ নম্বৰ ৫/২৫-ৰ তদন্তৰ অংশ হিচাপে তেওঁক কাইলৈ পুৱা ১১ বজাত হাজিৰ হ’বলৈ নিৰ্দেশ দিয়া হৈছে।

খবৰ অনুসৰি, মুখ্যমন্ত্ৰীৰ সতর্কতা কোষে গৌৰৱ গগৈৰ সৈতে ইসলামাবাদৰ আলি তৌকীৰ শ্বেখ নামৰ এজন ব্যক্তিৰ কথিত সম্পৰ্ক সন্দর্ভত তদন্ত চলাই আছে। এতিয়া সেই তদন্তৰ পৰিসৰ বিস্তাৰিত কৰি ৰিপুন বৰাৰ বক্তব্য আৰু সম্ভাৱ্য জ্ঞানৰ বিষয়ে তথ্য সংগ্ৰহৰ উদ্দেশ্যে তেওঁক জিজ্ঞাসাবাদ কৰা হ’ব।

এই সন্দৰ্ভত পত্ৰ লাভ কৰাৰ পাছত ৰিপুন বৰাই সংবাদ মাধ্যমক জনাইছে, “মই মুখ্যমন্ত্ৰীৰ সতর্কতা কোষৰ পৰা নোটিচ পাইছো। মোক কাইলৈ হাজিৰ হ’বলৈ কোৱা হৈছে। অভিযোগত কোৱা হৈছে যে গৌৰৱ গগৈৰ ইসলামাবাদৰ আলি তৌকীৰ শ্বেখ নামৰ এজন ব্যক্তিৰ সৈতে সম্পৰ্ক আছে, আৰু মই সেই বিষয়ে অবগত নে নহয় তাক লৈ প্ৰশ্ন কৰা হ’ব।”

তাৰোপৰি, মুখ্যমন্ত্ৰী হিমন্ত বিশ্ব শৰ্মাই তেওঁৰ আগৰ মন্তব্যবোৰ বিকৃত ৰূপত জনসাধাৰণৰ আগত উপস্থাপন কৰাৰ অভিযোগো তুলিছে ৰিপুন বৰাই। তেওঁ কয়, “মই সংবাদমেলত যি বক্তব্য দিছিলোঁ, সেয়া সম্পূৰ্ণৰূপে ফেচবুকত উপলব্ধ। মুখ্যমন্ত্ৰীয়ে মোৰ কথাবোৰ বিকৃত কৰি জনসাধাৰণৰ মাজত বিভ্ৰান্তি সৃষ্টি কৰিছে।