জাজৰিঃ প্ৰেমৰ প্ৰস্তাৱ প্ৰত্যাখান কৰাৰ বাবেই দাৰে আক্ৰমণ এগৰাকী কিশোৰীক। এই চাঞ্চল্যকৰ কাণ্ড সংঘটিত হৈছে নগাঁও জিলাৰ জাজৰি আৰক্ষী থানাৰ অন্তৰ্গত কাকমাৰিত। সোমবাৰে পুৱা এগৰাকী ১১ বছৰীয়া কিশোৰীক ঘৰলৈ ফুচুলাই নি দাৰে আক্ৰমণ কৰে বিমানজ্যোতি বৰা (২২) নামৰ এজন যুৱকে।

ইফালে এই ঘটনা সংঘটিত হোৱাৰ সময়ত কিশোৰীগৰাকীৰ চিঞৰ বাখৰ শুনি স্থানীয় একাংশ লোক পাষণ্ড যুৱকজনৰ ঘৰত উপস্থিত হোৱাত ঘটনাস্থলীৰ পৰা পলায়ন কৰে আক্ৰমণকাৰী বিমানজ্যোতি। পৰৱৰ্তী সময়ত গুৰুতৰভাৱে আঘাতপ্ৰাপ্ত হোৱা কিশোৰীগৰাকীক উদ্ধাৰ কৰি হাস্পতালত ভৰ্তি কৰোৱায় স্থানীয় ৰাইজে।

সম্প্ৰতি কিশোৰী গৰাকী নগাঁও মেডিকেল কলেজ হাস্পতালত চিকিৎসাধীন হৈ আছে। এই ঘটনাৰ পিছত অঞ্চলটোত চেপা উত্তেজনা বিৰাজ কৰিছে। ইতিমধ্যে পলাতক যুৱক জনক আৰক্ষীয়ে মৰিগাঁও জিলাৰ জালুগুটি অঞ্চলৰ পৰা গ্ৰেপ্তাৰ কৰিবলৈ সক্ষম হয়। আৰক্ষীয়ে ঘটনা সন্দৰ্ভত তথ্য আহৰণৰ বাবে অপৰাধ সংঘটিত কৰা যুৱক জনক জাজৰি আৰক্ষী থানাত জেৰা অব্যাহত অব্যাহত ৰাখিছে।

জানিব পৰা মতে, প্ৰেমৰ প্ৰস্তাৱ নাকচ কৰাৰ বাবেই কিশোৰীগৰাকীক আক্ৰমণৰ লক্ষ্য কৰি লৈছিল যুৱকজনে। সম্প্ৰতি আৰক্ষীয়ে ঘটনা সন্দৰ্ভত তদন্ত অব্যাহত ৰাখিছে।