চামগুৰিঃ দেওবাৰে নিশা চামগুৰিত সংঘটিত এক পথ দুৰ্ঘটনাত আঘাতপ্ৰাপ্ত হয় কণ্ঠশিল্পী অনুপম শইকীয়া। চামগুৰিৰ ৰঙাগড়ত চাৰিখনখনকৈ বাহন একেলগে দুৰ্ঘটনাগ্ৰস্ত হোৱাত সংগীত শিল্পীগৰাকীৰ লগতে আন কেইবাজনো আৰহীও আঘাতপ্ৰাপ্ত হয়।

জানিব পৰা মতে, ৰঙাগড়ত এখন মটৰ চাইকেলে অগা-দেৱা কৰাৰ ফলত পিছফালে আহি থকা এখন মেজিক, এখন হুণ্ডাই বাহন আৰু এখন ডাম্পাৰ দুৰ্ঘটনাত পতিত হয়। দুৰ্ঘটনাটোৰ সময়ত হুণ্ডাই বাহনখনেৰে যোৰহাট অভিমুখে গৈ আছিল সংগীত শিল্পী অনুপম শইকীয়া।

ইফালে দুৰ্ঘটনাটোৰ পিছত ডাম্পাৰখনে পলায়নৰ চেষ্টা চলায় যদিও স্থানীয় ৰাইজে ডাম্পাৰখন আৱদ্ধ কৰে। দুৰ্ঘটনাটোত সামান্য পৰিমাণে আঘাতপ্ৰাপ্ত হোৱা অনুপম শইকীয়াই চামগুৰি প্ৰাথমিক স্বাস্থ্য কেন্দ্ৰত স্বাস্থ্য পৰীক্ষা কৰাৰ পিছত নিজৰ বাসগৃহলৈ যায়।