বহু বিতৰ্কিত ট্ৰেডিং কেলেংকাৰিত জড়িত বুলি অভিযুক্ত নৃত্য শিল্পী চুমি বৰাৰ ভাতৃ বিশাল ফুকন আৰু স্বামী তাৰ্কিক বৰাই অবশেষত জামিন লাভ কৰিছে। গুৱাহাটী কেন্দ্ৰীয় কাৰাগাৰত বন্দী থকা এই দুয়োজন অভিযুক্তক ডিব্ৰুগড় জিলাৰ বৰবৰুৱা আৰক্ষী থানাত ৰুজু ৮৫/২০২৪ নম্বৰ গোচৰত জামিন দিয়া হয়। গুৱাহাটী উচ্চ ন্যায়ালয়ৰ ন্যায়াধীশ পাৰ্থিবজ্যোতি শইকীয়াৰ আদালতে আজি জামিন মঞ্জুৰ কৰে।

যদিও আদালতে জামিন মঞ্জুৰ কৰিছে, কাৰাবন্ধীসন্মুক্ত হ’বলৈ এতিয়াও কিছু পদ্ধতিগত দেৰি হ’ব পাৰে বুলি জানিব পৰা গৈছে।

ইপিনে, চুমি বৰাই এতিয়াও জামিন লাভ কৰা নাই। ১৯ নবেম্বৰত গুৱাহাটী চিবিআই আদালতে তেওঁৰ জামিন আবেদন নাকচ কৰিছিল। চুমি বৰা, তাৰ্কিক বৰা আৰু বিশাল ফুকনৰ বিৰুদ্ধে ৪,০০০ কোটি টকা ধন লুট কৰাৰ অভিযোগ উঠিছিল। অভিযুক্তসকলে চিকিৎসক, অভিযন্তা, শিল্পী, ব্যৱসায়ী আদি লোকৰ পৰা কোটি কোটি টকা সংগ্ৰহ কৰি দুগুণ লাভৰ প্ৰলোভন দেখুৱাই “ট্ৰেডিং”ৰ নামত প্ৰতাৰণা কৰিছিল।

বিশাল ফুকনে সংগৃহীত টকাৰে চুমি বৰাৰ বিলাসী জীৱনৰ বন্দোবস্ত কৰিছিল — জয়পুৰত কোটি টকাৰ বিবাহ, ডুবাই ভ্ৰমণ, আৰু দামী উপহাৰ। ২ লাখ টকীয়া টেডী বিয়াৰ উপহাৰ হিচাপে দিছিল বিশালে চুমিক।

এই কেলেংকাৰিৰ পটভূমিত ডিব্ৰুগড় সদৰ থানাৰ ৩৫২/২৪, দুলীয়াজান থানাৰ ৩৫৪/২৪ আৰু বৰবৰুৱা থানাৰ ৮৫/২৪ নং গোচৰত ৰুজু হোৱা মামলাসমূহ চিবিআইৰ জিম্মালৈ অৰ্পণ কৰা হয়। কিন্তু, এতিয়ালৈকে চিবিআইয়ে চাৰ্জশ্বিট দাখিলত ব্যৰ্থ হোৱা বাবে অভিযুক্তসকলে আইনী সুবিধা লভি জামিন লাভ কৰিছে।