বিলাসী অডি বাঁহনিত লুকাই থৈ পলায়ন কৰিছে গৰাকী৷ কিয়নো গৰাকীয়ে মানুহৰ পৰা লক্ষ লক্ষ টকা সংগ্ৰহ কৰি প্ৰৱঞ্চনা কৰি পলায়ন কৰিছে৷ বাঁহনিত এখন অডি বাহন উদ্ধাৰৰ পাছতে চাঞ্চলাৰ সৃষ্টি হৈছে তিতাবৰত৷ গাড়ীখন ট্রেডিং এফেক্সৰ ধন লুটি পলায়ন কৰা প্ৰৱঞ্চক প্ৰফুল্ল বৰাৰ বুলি চৰ্চা চলিছে৷ জানিব পৰা মতে, তিতাবৰৰ স্বাস্থ্য বিভাগৰ সাধাৰণ কৰ্মচাৰী প্ৰফুল্ল বৰা আছিল ট্রেডিং এফেক্সৰ অন্যতম এজেণ্ট আছিল৷ কেইবা শ লোকৰ পৰা ধন সংগ্ৰহ কৰিছিল প্ৰফুল্ল বৰাই৷ কিন্তু ট্ৰেডিং কেলেংকাৰীৰ বাতৰি প্ৰকাশৰ পাছতে পলায়ন কৰিছে৷ দীৰ্ঘদিন ধৰি পলাই থকা প্ৰফুল্ল বৰাই বহু লোকৰ পৰা ট্ৰেডিঙত ধন বিনিয়োগ কৰি সেই ধন দুগুণ কৰি দিয়া প্ৰতিশ্ৰুতি দিছিল৷ তেওঁৰ কোম্পানী আছিল ট্রেডিং এফেক্স৷ সেই ধনেৰে বিলাসী বাহন, তিতাবৰৰ বিভিন্ন ঠাইত ভূমি ক্ৰয় কৰাৰো অভিযোগ উত্থাপন কৰিছে ভুক্তভোগীয়ে। ট্রেডিং এফেক্সৰ বিনিয়োগকাৰীয়ে তিতাবৰৰ বগাৰগাঁৱত উপস্থিত হৈ পলাতক প্ৰফুল্ল বৰাই লুকুৱাই থোৱা AS-03AL-3312 নম্বৰৰ বিলাসী অডি বাহনখন উদ্ধাৰ কৰে। সম্পৰ্কীয় ককায়েকৰ ঘৰত লেতেৰা কাপোৰ আৰু তামোলৰ ঢকুৱা জাপি দি লুকুৱাই ৰাখিছিল বাহনখন৷ এইগৰাকী প্ৰৱঞ্চক প্ৰফুল্ল বৰাই তিতাবৰৰ ভিন্ন ক্ৰয় কৰা ভূমি আৰু সম্পত্তি শীঘ্ৰে উদ্ধাৰ হ’ব বুলি দাবী কৰিছে ভুক্তভোগীয়ে৷ প্ৰফুল্ল বৰাই ট্রেডিঙৰ জৰিয়তে বিশাল সম্পত্তিৰ মালিক হৈছিল। তিতাবৰ আৰক্ষীয়ে আৰু চিআইডিৰ দলে প্ৰফুল্ল বৰাক কিয় গ্ৰেপ্তাৰ কৰা নাই বুলি অভিযোগ আনিছে ভুক্তভোগীয়ে? তিতাবৰৰ ট্রেডিং কেলেংকাৰীৰ মাষ্টাৰ প্ৰফুল্ল বৰাৰ ক্ষেত্ৰত প্ৰশাসন নীৰৱ কিয় বুলিও প্ৰশ্ন উত্থাপন কৰিছে৷ আনহাতে, শ-শ লোকক প্ৰৱঞ্চনা কৰা বৰাই প্ৰায় ৬০ লাখ টকীয়া বাহনখন আৰক্ষীৰ চকুত ধূলি ৰখাটো সম্ভৱ নে বুলিও একাংশই প্ৰশ্ন উঠাইছে?