ৰাজ্যত কাহানিও নোহোৱা-নোপোজা কাণ্ড সংঘটিত হৈছে৷ এইবাৰ বছৰেকীয়া পৰীক্ষাৰ প্ৰশ্নকাকত ফাদিলৰ দৰে লজ্জাজনক কাণ্ড সংঘটিত হৈছে এইখন অসমত৷ নামনি অসমৰ বৰপেটা জিলাত নৱম শ্ৰেণীৰ বছৰেকীয়া পৰীক্ষাৰ প্ৰশ্নকাকত ফাদিল হোৱাত পৰীক্ষা বাতিল কৰিবলৈ বাধ্য হয় প্ৰশাসন৷ স্কুলৰ বছৰেকীয়া পৰীক্ষাৰো এতিয়া প্ৰশ্নকাকত ফাদিল হোৱাৰ ঘটনাই তীব্ৰ চাঞ্চল্যৰ সৃষ্টি কৰিছে সমগ্ৰ ৰাজ্যত৷ বছৰেকীয়া পৰীক্ষাৰ ইংৰাজী বিষয়ৰ প্ৰশ্ন ভাইৰেল হৈ পৰাৰ পিছতেই পৰীক্ষা বাতিলৰ নিৰ্দেশ দিয়ে প্ৰশাসনে। জানিব পৰা মতে, আজি আছিল নৱম শ্ৰেণীৰ ইংৰাজী বিষয়ৰ পৰীক্ষা৷ বৰপেটা জিলা পৰীক্ষা বৰ্ডৰ অধীনত অনুষ্ঠিত ইংৰাজী পৰীক্ষাৰ বাবে ছাত্ৰ-ছাত্ৰী সাজু হোৱাৰ সময়তে নিশাই পৰীক্ষাত বাতিল ঘোষণা কৰাত ছাত্ৰ-ছাত্ৰী চিন্তাত পৰে৷ সমানে উদ্বেগ প্ৰকাশ কৰে অভিভাৱকে৷ অভিযোগ মতে, নিশা ইংৰাজী পৰীক্ষাৰ প্ৰশ্ন কাকত ভাইৰেল হোৱা বুলি জিলা পৰীক্ষা বৰ্ডে অৱগত হৈছিল৷ ইয়াৰ পিছতেই পৰীক্ষা বাতিলৰ সিদ্ধান্ত লয় কৰ্তৃপক্ষই৷ নিশাই বিদ্যালয়সমূহৰ পৰিদৰ্শকে এখন জাননী যোগে নৱম শ্ৰেণীৰ ইংৰাজী বিষয়ৰ পৰীক্ষা বাতিলৰ নিৰ্দেশ দিয়ে৷ বছৰেকীয়া পৰীক্ষাৰ প্ৰশ্ন কাকত ফাদিল ঘটনা সন্দৰ্ভত বৰপেটা আৰক্ষী থানাত পৰীক্ষা বৰ্ডে এজাহাৰ দাখিল কৰিছে৷ প্ৰশ্নকাকত বাতিলৰ ঘটনাক তীব্ৰ গৰিহণা দিছে বৰপেটা জিলা কংগ্ৰেছে৷ কংগ্ৰেছে বৰপেটা টাউনত প্ৰতিবাদ সাব্যস্ত কৰি শিক্ষামন্ত্ৰীৰ পুত্তলিকা দাহ কৰে৷ নৱম শ্ৰেণীৰ বছৰেকীয়া পৰীক্ষাৰ ইংৰাজী পৰীক্ষাৰ প্ৰশ্ন কাকত ফাদিল হোৱা ঘটনাৰ বিৰুদ্ধে বৰপেটা জিলা কংগ্ৰেছে প্ৰতিবাদী কাৰ্যসূচী ৰূপায়ন কৰে। ৰাজ্য চৰকাৰ বিয়াগোম শিক্ষা বিভাগ আৰু প্ৰশাসনে ব্যৱস্থাটোৱে এটা পৰীক্ষা সুস্থিৰতাৰে অনুষ্ঠিত কৰিব নোৱাৰাৰ অভিযোগ উত্থাপন হৈছে৷