প্ৰধানমন্ত্ৰী নৰেন্দ্ৰ মোদীয়ে আগন্তুক ২৪ ফেব্ৰুৱাৰীত গুৱাহাটীৰ সৰুসজাই ষ্টেডিয়ামত বিশাল ঝুমুৰ নৃত্যৰ প্ৰদৰ্শন উপভোগ কৰিব। লগতে সন্ধিয়া খানাপাৰাৰ খেলপথাৰত অনুষ্ঠিত প্ৰদৰ্শনীখনত প্ৰায় ৪০ ৰ পৰা ৪৫ মিনিট সময় অতিবাহিত কৰাৰ ইচ্ছা প্ৰকাশ কৰিছে। এই প্ৰদৰ্শনীত অসমৰ সাংস্কৃতিক ঐতিহ্য আৰু ভৱিষ্যতৰ আকাংক্ষা প্ৰদৰ্শন কৰা হ’ব। ‘প্ৰাইড অৱ আসাম’ নামৰ এক বিশেষ গেলেৰীৰ জৰিয়তে ৰাজ্যখনৰ সামগ্ৰী প্ৰদৰ্শন কৰা হ’ব।

আজি মুখ্যমন্ত্ৰী হিমন্ত বিশ্ব শৰ্মাই লোকসেৱা ভৱনত এখন সংবাদমেলত এই তথ্য প্ৰকাশ কৰিছে। তেওঁ কয় যে এই প্ৰদৰ্শনীয়ে অসমৰ ভৱিষ্যতৰ উন্নয়ন আৰু আধুনিকীকৰণৰ প্ৰচেষ্টাৰ ওপৰত আলোকপাত কৰিব। বিশ্ব ৰেকৰ্ডৰ বাবে অনুষ্ঠিত মেগা ঝুমুৰ নৃত্য প্ৰদৰ্শন আৰু এডভাণ্টেজ আসাম ২.০লৈ মাত্ৰ চাৰি দিন বাকী থকা অৱস্থাত মুখ্যমন্ত্ৰীয়ে এই সংবাদমেলত প্ৰধানমন্ত্ৰীৰ আগন্তুক কাৰ্যসূচীৰ বিতং বিৱৰণ দাঙি ধৰে।

এডভাণ্টেজ আসাম ২.০ৰ বাবে ডাঙৰ আশা

মুখ্যমন্ত্ৰীয়ে কয় যে এডভাণ্টেজ আসাম ২.০ সন্মিলনৰ পৰা ১.৫ লাখ কোটি টকাৰ বিনিয়োগৰ আশা কৰা হৈছে। ইয়াৰে ৫০,০০০ কোটিতকৈও অধিক মূল্যৰ আন্তঃগাঁথনি প্ৰকল্পৰ আশা ব্যক্ত কৰিছে। সন্মিলনখনে ১ লাখ কোটিৰ অধিক সুযোগ আনিব বুলি আশা কৰা হৈছে। বৰ্তমানৰ আকলনত মুকেশ আম্বানী আৰু সজ্জন জিন্দলকে ধৰি উদ্যোগৰ নেতৃবৃন্দই কৰা মুখ্য কৰ্পোৰেট ঘোষণাসমূহ বাদ দিয়া হৈছে।

গুৰুত্বপূৰ্ণ বৈঠক আৰু আলোচনা

দুদিনীয়া অনুষ্ঠানটোত কেইবাখনো গুৰুত্বপূৰ্ণ বৈঠক অনুষ্ঠিত হ’ব। য’ত কেন্দ্ৰীয় মন্ত্ৰীসকলে মুখ্য ভাষণ প্ৰদান কৰিব। বিকশিত অসম নামৰ এখন বৈঠক কেন্দ্ৰীয় মন্ত্ৰী জ্যোতিৰাদিত্য সিন্ধিয়াৰ অধ্যক্ষতাত অনুষ্ঠিত হ’ব। আন এক ‘এক্ট ইষ্ট, এক্ট ফাষ্ট এণ্ড এক্ট ফাৰ্ষ্ট’ শীৰ্ষক বৈঠকত বৈদেশিক পৰিক্ৰমা মন্ত্ৰী এছ. জয়শংকৰে অংশগ্ৰহণ কৰিব। ইলেক্ট্ৰনিক্স মন্ত্ৰী অশ্বিনী বৈষ্ণৱে অতিৰিক্ত মূল বক্তব্য আগবঢ়াব আৰু কেন্দ্ৰীয় পেট্ৰ’লিয়াম আৰু প্ৰাকৃতিক গেছ মন্ত্ৰী হৰদীপ সিং পুৰীয়ে হাইড্ৰ’কাৰ্বন সম্পৰ্কে আলোচনাত অংশ ল’ব।

ছেমি কণ্ডাক্টৰ প্ৰকল্পৰ ওপৰত গুৰুত্ব

মুখ্যমন্ত্ৰীয়ে কয় যে অসমৰ ছেমি কণ্ডাক্টৰ প্ৰকল্পটোৱে ৰাজ্যখনত সুযোগ আনিব আৰু বিদেশী বিনিয়োগকাৰীসকলৰ বাবে এক ডাঙৰ আকৰ্ষণ হিচাপে কাম কৰিব। তেওঁ কয় যে সমগ্ৰ বিশ্বতে অসমৰ পৰিচয় ছেমি কণ্ডাক্টৰ প্ৰকল্পৰ সৈতে টেগ কৰা হৈছে। জাপানৰ পৰা উভতি অহাৰ পিছত জাপানৰ ৰাষ্ট্ৰদূতে অসমৰ ছেমি কণ্ডাক্টৰ গোট পৰিদৰ্শন কৰে আৰু প্ৰকল্পটোৰ প্ৰতি আন্তৰ্জাতিক আগ্ৰহ শক্তিশালী কৰিছে।

অষ্ট্ৰেলিয়াৰ ভ্ৰমণ নিষেধাজ্ঞাৰ পৰ্যালোচনা

অষ্ট্ৰেলিয়াৰ নাগৰিকসকলক অসম ভ্ৰমণৰ বিৰুদ্ধে জাৰি কৰা পৰামৰ্শক লৈ মুখ্যমন্ত্ৰীয়ে কয় যে তাৰ নাগৰিকক চাৰিখন জিলালৈ নাযাবলৈ কোৱা হৈছে। য’ত সশস্ত্ৰ বাহিনী বিশেষ ক্ষমতা আইন বলবৎ আছে। মুখ্যমন্ত্ৰী শৰ্মাই কয় যে অষ্ট্ৰেলিয়াই ৰাজ্যখন ভ্ৰমণ কৰা নাগৰিকসকলৰ বাবে জাৰি কৰা ভ্ৰমণ নিষেধাজ্ঞাৰ পৰ্যালোচনা কৰিছে সংশোধিত নিৰ্দেশনা ঘোষণা কৰিছে। তেওঁলোকে তিনিচুকীয়া, চৰাইদেউ, ডিব্ৰুগড় আৰু শিৱসাগৰক বাদ দি অসমৰ সকলো জিলাতে ভ্ৰমণ কৰিব পাৰে।