অলেখ গুণমুগ্ধ, আত্মীয় স্বজনক কন্দুৱাই অইহসংসাৰৰ পৰা মেলানি মাগে সংগীত শিল্পী বীণা ভাগৱতীয়ে৷ মহানগীৰৰ জু-ৰোডস্থিত নিজ বাসগৃহ ৮৮ বছৰ বয়সত শেষ নিশ্বাস ত্যাগ কৰে৷ অসুস্থ হৈ থকা বীণা ভাগৱতীয়ে আজি পুৱা প্ৰায় ৬ বজাত মৃত্যুক আকোৱালি লয়৷ ১৯৩৭ চনৰ ১২ ডিচেম্বৰত কামৰূপ জিলাৰ পলাশবাৰীত জন্মগ্ৰহণ কৰা বীণা ভাগৱতীয়ে কৈশোৰ অৱস্থাৰ পৰাই মাতৃ আৰু মোমায়েকৰ তত্বাৱধনাত গানৰ সাধনা কৰিছিল৷ গানৰ আনুষ্ঠানিক শিক্ষাও গ্ৰহণ কৰিছিল৷ বিশিষ্ট গানৰ সাধক হৰলাল বেনার্জী, জীতেন দেৱ, পৰেশ ৰায়ৰ সান্নিধ্যত সংগীতৰ শিক্ষা গ্ৰহণ কৰিছিল৷ উচ্চশিক্ষা গ্ৰহণ কৰালৈকে সংগীতৰ জগতখনৰ সৈতে জড়িত থকাৰ লগতে হাজো ছোৱালী হাইস্কুল, ৰামপুৰ মাধৱদেৱ ছোৱালী হাইস্কুল আৰু মির্জা সৰপাৰা হাইস্কুলত শিক্ষকতা কৰিছিল৷ চৰকাৰী চাকৰি এৰি ১৯৭৪ চনত লক্ষ্ণৌৰ ভাটখাণ্ডে সংগীত বিদ্যাপীঠত শাস্ত্রীয় সংগীতত বিশাৰদ ডিগ্রী লাভ কৰে। অসমৰ সেই সময়ৰ অন্যতম সংগীত শিল্পী ৰূপে লতা মংগেশকাৰৰ সান্নিধ্য লাভ কৰিছিল বীণা ভাগৱতীয়ে৷ তেখেতে কেৱল অসমতো নহয় ৰাজ্যৰ বাহিৰতো সংগীত পৰিৱেশন কৰি খ্যাত লাভ কৰিছিল৷ পঞ্চম শ্রেণীত অধ্যয়নৰত অৱস্থাত প্ৰথমবাৰ ১৯৫০ চনত গুৱাহাটীৰ অনাতাঁৰ কেন্দ্র যোগে ‘ভকতিৰ ধূপ পুৰি যায় প্রভু’ শীৰ্ষক বৰগীত গীত গাইছিল৷ বহু বৰগীত, ভজন, লোকগীত, বিহুসুৰীয়া গীত ৰেডিঅ’ যোগে প্ৰচাৰ হোৱাত ব্যাপক জনপ্ৰিয়তা লাভ কৰিছিল৷