উজনি অসমৰ কৃষ্টি-সংস্কৃতিৰে চহকী মৰাণ জনগোষ্ঠীৰ আবেগ তথা অসমীয়া জাতিৰ অতুল্য সাহস, বীৰত্ব, স্বদেশ প্ৰেমৰ নিদৰ্শন বীৰ ৰাঘৱ মৰাণৰ স্মৃতি দিৱস উপলক্ষে মুখ্যমন্ত্ৰী হিমন্ত বিশ্ব শৰ্মাই বিশেষ ঘোষণা কৰিছে৷ মহান বীৰ সন্তানগৰাকীৰ স্মৰণাৰ্থে ৰাজ্য চৰকাৰে ১৯ নৱেম্বৰৰ দিনটোক ৰাজ্যিক কৰ্মচাৰীসকলৰ বাবে সীমিত বন্ধ (Restricted Holiday)ৰ দিন হিচাপে ঘোষণা কৰিছে৷ এই পদক্ষেপক আদৰণি জনাইছে মৰাণ জনগোষ্ঠীৰ দল-সংগঠনে৷

উল্লেখ্য যে, আহোম শাসনকালত বীৰ ৰাঘৱ মৰাণ আছিল মৰাণ জনগোষ্ঠীক নেতৃত্ব দিয়া নেতা। পিছলৈ মৰাণসকলৰ স্বাভিমানৰ প্ৰতীক হৈ পৰে। আহোম বুৰঞ্জী মতে, মৰাণসকলে আহোম ৰজাক হাতী যোগান ধৰিছিল। এবাৰ অকামিলা হাতী যোগান ধৰাৰ অভিযোগত ৰাজ বিষয়া কীৰ্তি চন্দ্ৰ বৰবৰুৱাই (গেন্ধেলা বৰুৱা) ৰাঘৱ মৰাণ আৰু নাহৰ শইকীয়াক শাৰীৰিকভাৱে অপদস্থ কৰে।

তাৰ পিছতে দুয়োজনে ঘূৰি গৈ নিজৰ মানুহৰ মাজত এই কথা ব্যক্ত কৰাত অপমানৰ পোটক তুলিবলৈ মোৱামৰীয়া মহন্তৰ শিষ্যসকলে আহোম ৰজাৰ বিৰুদ্ধে বিদ্ৰোহৰ পাতনি মেলে। অপমানিত সাধাৰণ প্ৰজাই ৰজাঘৰীয়া স্বৈৰাচাৰৰ বিৰুদ্ধে প্ৰথমটো মোৱামৰীয়া বিদ্ৰোহৰ সূচনা হৈছিল ১৭৬৯ খ্ৰীষ্টাব্দত।