আজি মহাসপ্তমী৷ মহা সপ্তমীৰ পূজা চাবলৈ পেণ্ডেলে পেণ্ডেলে ভক্তসকলে আৰাধনা কৰা দেখা গৈছে৷ পুৱা ৯ বাজি ১২ মিনিট ৪২ ছেকেণ্ডৰ পৰা দেৱীৰ নৱপত্ৰিকা স্থাপন, সপ্তমদী, কল্পাৰম্ভ আৰু মহা সপ্তমীবিহিত পূজা আৰম্ভ হয়৷ পুৱাই নদীঘাটত নৱপত্ৰিকা ধোৱাই মাতৃস্বৰূপা, শক্তিদাত্ৰী, দেৱী দশভূজাক আৰাধনাৰ পৰ্ব আৰম্ভ হয়৷ আজি সমগ্ৰ দিনটো কালৰাত্ৰি ৰূপত দেৱীক ভক্তই পূজা কৰিছে৷ মহাসপ্তমীত দেৱীক আৰাধনা কৰিলে অশুভ শক্তি নাইকীয়া হোৱা বুলি কোৱা হয়৷ ইপিনে মহানগৰীৰ মা কামাখ্যাত ঘট পূজা কৰা হয়৷ কামাখ্যাত ঘট পূজাৰ লগতে মহ বলি দিয়া হয়৷ এইবেলি কামাখ্যা মন্দিৰৰ তৰফৰ সাতটা মহ আৰু ভক্তই আগবঢ়োৱা জন্তু বলি দিয়া হয়৷ গুৱাহাটীৰ উগ্ৰতাৰা দেৱালয়ত হাঁহ, পাৰ, ছাগলী, কোমোৰা আদি বলি দিয়া হয়৷ নৱমীৰ দিনা উগ্ৰতাৰা দেৱালয়ত ৭টা মহ বলি দিয়া হ’ব৷ নলবাৰী জিলাৰ শ্ৰী শ্ৰী বিল্বেশ্বৰ দেৱালয়ত দেৱীৰ চৰণত প্ৰদান কৰা হাঁহ, পাৰ, ছাগলী, কোমোৰা বলি দিয়া হয়৷ দুৰ্গা দেৱীৰ নৱপত্ৰিকা প্ৰবেশথাৰ সপ্তমাদি কল্পৰামভাত মহাসপ্তমী চলে। পুৱাৰে পৰা পেণ্ডেলত দেৱী-দৰ্শন, দেৱীৰ চৰণত ভক্তসকলক অঞ্জলী আগবঢ়োৱা আৰু মহাপ্ৰসাদ লোৱা পৰ্ব চলিছে। পুৱাই নৱপত্ৰিকা স্নানৰ পিছত হিন্দু ধৰ্মৰ ৰীতি-নীতি অনুসৰণ কৰি মণ্ডপত মহাসপ্তমীৰ পূজা আৰম্ভ হয়। দুৰ্গা মূৰ্তিৰ সন্মুখত মংগল ঘাট, চাকি, ধুনুচিৰ লগতে ফুল, দুৰ্বা, বেলপাত, চন্দন ছটিওৱা হৈছে৷ পূজা মণ্ডপৰ চাৰিওফালে জপ, শংখ, উলুধৱানী, ধূপৰ গোন্ধেৰে পেণ্ডেলবোৰ আমোল মোলাইছে৷ পুৰোহিতৰ মন্ত্ৰোচ্চাৰণ, মংগল ধ্বনি, শংখ, ঢাক-ঢোলৰ ধ্বনিয়ে আকাশ ৰজনজনাই গৈছে৷ সৰ্বভূতৰ মাতৃস্বৰূপা, শক্তিদাত্ৰী, দেৱী দশভূজাৰ পৱিত্ৰ পূজা মণ্ডপত মহাঅষ্টমী, মহানৱমী আৰু বিজয়া দশমীৰ প্ৰস্তুতি চলাই থকা হৈছে৷