মুখ্যমন্ত্ৰী হিমন্ত বিশ্ব শৰ্মাক তীব্ৰভাৱে আক্ৰমণ কৰি অসম প্ৰদেশ কংগ্ৰেছ কমিটিৰ সভাপতি গৌৰৱ গগৈয়ে আজি ৰাজীৱ ভৱনত অনুষ্ঠিত সংবাদ-মেলত একাধিক গুৰুত্বপূৰ্ণ মন্তব্য আগবঢ়ায়। তেওঁ মুখ্যমন্ত্ৰীগৰাকীক পাকিস্তানৰ স্থপতি মহম্মদ আলী জিন্নাৰ সৈতে তুলনা কৰি কয় — “নিজৰ চৰকাৰৰ বিফলতা ঢাকিবলৈ তেওঁ জিন্নাৰ দৰে সাম্প্ৰদায়িক ৰাজনীতিৰে অশান্তি সৃষ্টি কৰিবলৈ চেষ্টা কৰিছে।”

“অসমত মণিপুৰৰ দৰে পৰিৱেশ হ’ব নিদিও”

গগৈয়ে কয়, “বিজেপি আৰু তেওঁলোকৰ সহযোগী কিছু সংগঠনে মণিপুৰৰ দৰে সাম্প্ৰদায়িক সংঘৰ্ষ অসমতও ঘটাই দিবলৈ চেষ্টা কৰিছে, কিন্তু আমি অসমবাসীয়ে সেই ষড়যন্ত্ৰ সফল হ’বলৈ নিদিও।”

তেওঁ স্পষ্টভাৱে উল্লেখ কৰে — “নির্বাচন আহি আছে, তাই মুখ্যমন্ত্ৰীয়ে বিফলতা ঢাকিবলৈ সাম্প্ৰদায়িক ৰণনীতি গ্ৰহণ কৰিছে। বিজেপিৰ ভিতৰত কিছু ‘ক্ৰিমিনেল মাইণ্ড’ থকা লোক এই ষড়যন্ত্ৰত জড়িত।”

গোমাংস উদ্ধাৰৰ ঘটনাত তীব্ৰ প্ৰতিক্ৰিয়া

লখিমপুৰত সাম্প্ৰতিক গোমাংস উদ্ধাৰৰ ঘটনাৰ সন্দৰ্ভত গগৈয়ে কয় — “এই আইডিয়াটো তেওঁলোকক কোনে দিলে? ধৰা পৰা সকলোৰে ওপৰত নিরপেক্ষ তদন্ত হ’ব লাগে।” কংগ্ৰেছ দল ধর্ম আৰু জাতিৰ ভিত্তিত মানুহৰ মাজত বিভাজন নকৰে বুলিও তেওঁ স্পষ্ট কৰে।

“গাড়ীত কোন বহে নহয়, গেছ লীক কেতিয়া বন্ধ হ’ব সেয়া জনাও”

মুখ্যমন্ত্ৰীৰ “গৌৰৱ গগৈৰ গাড়ীত ভাইৰাছ আছে” বুলি কৰা মন্তব্যৰ প্ৰত্যুত্তৰত গগৈয়ে কটাক্ষ কৰি কয় — “গাড়ীত কোন বহে তাৰ ওপৰত নহয়, ৰাইজে জানিব বিচাৰে যে শিৱসাগৰৰ অ’এনজিচিৰ গেছ লীক কেতিয়া বন্ধ হ’ব।” লগতে তেওঁ কয় — “মুখ্যমন্ত্ৰীৰ ঘৰতো কংগ্ৰেছৰ লোক আছে, তাই তেওঁ যি ক’ব লাগে সেইবোৰ খবৰ মোক আগেয়ে পোৱাই যায়।”

তেওঁ কেন্দ্ৰীয় গৃহমন্ত্ৰী অমিত শ্বাহৰ বানৰ সময়ত “পুখুৰী খন্দা” মন্তব্যৰ উল্লেখ কৰি কয় — “সেই পুখুৰী ক’ত? মুখ্যমন্ত্ৰীয়ে ক’ত মাটি দান দিলে? উলটে বড়ো, ৰাভা, কাৰ্বি, ডিমাছাসকলৰ মাটি হস্তান্তৰ কৰিছে।”

বংশবাদ বিতর্ক আৰু বিজেপিৰ ‘চিনেমা ষড়যন্ত্ৰ’

কংগ্ৰেছৰ নতুন কমিটিক লৈ একাংশ সংবাদ মাধ্যমে দিয়া “বংশবাদ” সন্দৰ্ভত মন্তব্য প্ৰত্যাখ্যান কৰি গগৈয়ে কয় — “যদি কংগ্ৰেছত বংশবাদ থাকে, তেন্তে প্ৰফুল্ল দাস যেন এক স্বচ্ছ, ৰাজনীতিত নতুন মুখ কেনেকৈ ছ’চিয়েল মিডিয়াৰ অধ্যক্ষ হ’ল?” তেওঁ লগতে কয় — “প্ৰতীক বৰদলৈ ছ’চিয়েল মিডিয়াৰ এক প্ৰতিভাশালী যুৱক, সেইকাৰণে তেওঁক সহ-অধ্যক্ষ কৰা হৈছে।”

তেওঁ ৰসিকতা কৰি মন্তব্য কৰে — “বিজেপিয়ে মোক লৈ দুদিনৰ ভিতৰত ভুৱা চিনেমা বনাব বুলি খবৰ পাইছো। মই শুনিছো, মোৰ চেহেৰা লগাই কিবা এআই চিনেমা বনাব। এইবোৰ এআইৰ যুগ, তাই আমাৰ দলেো টেকনলজি জানে, আমি তাৰ প্ৰস্তুতি লৈছো।”

নতুন কংগ্ৰেছৰ যাত্ৰা আৰু ভোটৰ ৰণনীতি

সংবাদ-মেলত গগৈয়ে সদৰী কৰে যে তেওঁ সভাপতি পদত বহি যি নতুন পৰ্যবেক্ষকসকলক নিযুক্তি দিছিল, তেওঁলোকৰ দাখিল কৰা প্ৰতিবেদনসমূহৰ ওপৰত দিনটো জুৰি আলোচনা চলিব। সেই ভিত্তিতেই নিখিল ভাৰত কংগ্ৰেছ কমিটিৰ সৈতে আলোচনা কৰি অসম বিধানসভা নিৰ্বাচনৰ ৰণনীতি প্ৰস্তুত কৰা হ’ব।