অসমৰ ৰাজনীতি পুনৰ এবাৰ উত্তপ্ত হৈ পৰিছে। ষ্টাৰ প্ৰচাৰক হিচাপে পৰিচিত শুকুৰ আলীয়ে আহোম জনগোষ্ঠীক লৈ কৰা অপমানজনক মন্তব্যে ৰাজ্যজুৰি তীব্ৰ প্ৰতিক্ৰিয়াৰ সৃষ্টি কৰিছে।

এক সংখ্যালঘু এলেকাত অনুষ্ঠিত সভাত শুকুৰ আলীয়ে কয়, “আহোমসকলে একো কৰা নাই, কেৱল লবী ৰাজনীতি কৰিছে। লাচিত বৰফুকনো লবী ৰাজনীতিত পৰিপুষ্ট আছিল।” লগতে তেওঁ কৈছে, “ৰাম মন্দিৰ নিৰ্মাণ হোৱা মাটি ঔৰংজেৱে দি গৈছিল। কামাখ্যা মন্দিৰ য’ত নিৰ্মিত, সেই মাটিও ঔৰংজেৱে দিয়া বুলি কোৱা হয়।” এই মন্তব্যই উজনি অসমত বিশেষকৈ আহোম জনগোষ্ঠীৰ মাজত ব্যাপক ক্ষোভৰ সঞ্চাৰ কৰিছে।

সামাজিক মাধ্যমত শুকুৰ আলীক “বিকৃতমস্তিষ্কৰ লম্পট” বুলি আখ্যা দি বহুতে তীব্ৰ প্ৰতিবাদ জনাইছে। একাংশে সোধে, “আহোমসকলক অপমান কৰিবলৈ ক’ত সাহস পালে?” আৰু “ঔৰংজেৱে দিয়া মাটিত কামাখ্যা মন্দিৰৰ নিৰ্মাণ—এই তথ্য কোনখন বুৰঞ্জীত আছে?” বুলি খং উজাৰিছে।

এই মন্তব্যৰ বিৰুদ্ধে সদৌ অসম গোসাঁই সমাজ আৰু অন্যান্য আহোম সংগঠনে দিছপুৰ আৰক্ষী থানাত শুকুৰ আলীৰ বিৰুদ্ধে এজাহাৰ দাখিল কৰিছে। সংগঠনসমূহে শুকুৰক কঠোৰ শাস্তি দিয়াৰ দাবী জনাইছে।

কংগ্ৰেছৰ মুখপাত্ৰ ৰূপা কলিতাই এই মন্তব্যক সমালোচনা কৰি কয়, “বিজেপিয়ে আগতে বহুবার আহোমসকলক অপমান কৰিছে, আৰু এতিয়া শুকুৰ আলীক আগবঢ়াই অপমান কৰোৱা হৈছে। এই অপমান অসমৰ ইতিহাসক অসম্মান কৰা।”