ৰঙালী বিহুৰ উলহ-মালহৰ মাজত নগাঁও জিলাৰ কলিয়াবৰত চাহ বাগিচাৰ শ্ৰমিকসকলৰ দৰমহা আদায়ৰ দাবীত উত্তপ্ত পৰিস্থিতিৰ সৃষ্টি কৰে । বেতন নোপোৱা শ্ৰমিকসকলে বুধবাৰে ৰাষ্ট্ৰীয় ঘাইপথ অৱৰোধ কৰি প্ৰতিবাদ সাব্যস্ত কৰে। ইয়াৰ ফলত শ্ৰমিক আৰু আৰক্ষীৰ মাজত হতা-হতিৰ ঘটনা ঘটে।

:
কলিয়াবৰৰ চিকনি চাহ বাগিচাৰ শ্ৰমিকসকলে প্ৰথমে বাগিচাৰ মেনেজাৰৰ কাৰ্যালয় ঘেৰাও কৰে। দীৰ্ঘদিন ধৰি বেতন আৰু মৌলিক সুবিধা নোপোৱা শ্ৰমিকসকলে কৰ্তৃপক্ষৰ সৈতে আলোচনাৰ দাবী কৰিলেও প্ৰশাসন আৰু মালিকপক্ষৰ অনীহাই পৰিস্থিতি উত্তপ্ত কৰে। ক্ষুদ্ধ হৈ শ্ৰমিকসকলে ৰাষ্ট্ৰীয় ঘাইপথ ৩৭ ডি অভিমুখে যাত্ৰা কৰে আৰু পথ অৱৰোধ কৰে। আৰক্ষীয়ে প্ৰথমে শ্ৰমিকসকলক বাধা দিবলৈ চেষ্টা কৰিলেও সংখ্যাধিক্যৰ মুখামুখি হয়। প্ৰতিবাদকাৰীসকলৰ বেছিভাগেই মহিলা হোৱা বাবে পুলিচে প্ৰাৰম্ভিকভাৱে নিষ্ক্ৰিয়তা দেখুৱায়। পিছলৈ হেঁচা-ঠেলাত কেইগৰাকীমান শ্ৰমিকক আৰক্ষীয়ে পথৰ পৰা আঁতৰোৱাত উত্তাপ বাঢ়ে।

এগৰাকী মশ্ৰমিকে কয়, “মালিকে শনিবাৰে দৰমহা দিয়াৰ কথা কৈ আজিলৈকে একো নিদিলে। ল’ৰা-ছোৱালীৰ স্কুলৰ নামভৰ্তি কৰিব নোৱাৰিলোঁ। খৰি-পাতৰ অভাৱত সংসাৰ চলোৱাও টান।” আন এজনে অভিযোগ কৰে, “মালিকে দুদিন সময় খুজিছিল, কিন্তু কেইসপ্তাহ পাৰ হ’ল। ৰেচন-বেতন একো নাই। সহায় নোপোৱাত ৰাস্তালৈ ওলাই আহিবলৈ বাধ্য হ’লোঁ।”

বাগিচা কৰ্তৃপক্ষই সমস্যা সমাধানৰ পৰিৱৰ্তে এচি কক্ষত আছে। প্ৰশাসনেও আলোচনাৰ সুযোগ নিদিয়াত পৰিস্থিতি নিয়ন্ত্ৰণৰ বাহিৰ হয়। স্থানীয়ভাবে ৰঙালী বিহুৰ উৎসৱৰ মাজত এই বিক্ষোভে সামাজিক আৰু অর্থনৈতিক বৈষম্যৰ চিত্ৰ ফুটি তুলিছে।