মমতা বেনাৰ্জীৰ দলে অসমত সাংগঠনিক ভেটি শক্তিশালী কৰিবলৈ উঠি-পৰি লাগিছে৷ পশ্চিমবংগৰ পৰা হায়াৰ কৰি অনা নেতাক অসমৰ তৃণমূল কংগ্ৰেছৰ দায়িত্ব দিয়া হৈছে৷ পশ্চিমবংগৰ আইন মন্ত্ৰী মোলয় ঘটকক অসম তৃণমূলৰ দায়িত্ব দিয়া হৈছে। দেওবাৰে অল ইণ্ডিয়া তৃণমূল কংগ্ৰেছে জাৰি কৰা এক প্ৰেছ বিজ্ঞপ্তিত এই ঘোষণা কৰা হৈছে। এমাহ পূৰ্বে প্ৰদেশ সভাপতিৰ দায়িত্ব এৰাৰ লগতে দলৰ ত্যাগ কৰিছিল ৰিপুন বৰাই৷ বৰ্তমান নেতৃত্বহীন হৈ থকা দলটোৰ অসম প্ৰদেশ সমিতিৰ দায়িত্ব হৈছে মোলয় ঘটকক৷ লোকসভা নিৰ্বাচনৰ পূৰ্বে কংগ্ৰেছৰ প্ৰাক্তন নেতা ৰিপুন বৰাৰ নেতৃত্বত অসমত সংগঠন শক্তিশালী কৰিবলৈ ব্যাপক প্ৰস্তুতি চলাইছিল দলটোৱে৷ কিন্তু ফলাফল শূন্য৷ এজনো প্ৰাৰ্থীয়ে ৫ হাজাৰতকৈ বেছি ভোট লাভ নকৰিলে৷ সন্তোষ মোহন দেৱৰ কন্যা সুস্মিতা দেৱক দুবাৰকৈ ৰাজ্যসভালৈ প্ৰেৰণ কৰা হৈছে। ৰিপুন বৰা সুস্মিতা সেনৰ জড়িয়তে টিএমচিলৈ গৈছিল৷ লোকসভা নিৰ্বাচনত দলটোৱে অসমত চাৰিখন আসনত প্ৰতিদ্বন্দিতা কৰিছিল। শিলচৰ, লখিমপুৰ, বৰপেটা আৰু কোকৰাঝাৰ আসনত শোচনীয় পৰাজয়ৰ সন্মুখীন হয়। লোকসভা নিৰ্বাচনৰ পিছতে ৰিপুন বৰাই ১ ছেপ্টেম্বৰত অসম টিএমচিৰ সভাপতি পদ আৰু দল ত্যাগ কৰে। তেতিয়াৰ পৰা অসম টিএমচিৰ সভাপতিৰ পদ খালী হৈ আছে। এইবাৰ বংগৰ পৰা এজন নেতাক অসমলৈ পঠিয়াই তৃণমূলে অসমত সংগঠন শক্তিশালী কৰিব বিচাৰিছে। মোলয়ে কয় যে দলটোৱে মোক দায়িত্ব দিয়ে, মই সেই দায়িত্ব পালন কৰিবই লাগিব।