গুৱাহাটীঃ লোকসভা নিৰ্বাচনত যোৰহাট সমষ্টিৰ পৰা বিজয় সাব্যস্ত কৰাৰ পিছত এইবাৰ কেন্দ্ৰীয় ৰাজনীতি এৰি অসমৰ ৰাজনীতিলৈ উভতি আহিবলৈ যো-জা চলাইছে গৌৰৱ গগৈয়ে। ২০২৬ৰ বিধানসভা নিৰ্বাচনত ৰাজ্যত কংগ্ৰেছক শক্তিশালী কৰাৰ দায়িত্ব মূৰ পাতি লৈ বিধানসভা নিৰ্বাচনত নিজেই প্ৰতিদ্বন্দ্বিতা কৰিব পাৰে গৌৰৱ গগৈয়ে।
ইতিমধ্যে গৌৰৱ গগৈক লৈ চৰ্চা চলিছে যে দুবছৰ পিছত অনুষ্ঠিত হ’বলগীয়া ৰাজ্যিক নিৰ্বাচনত গোলাঘাট সমষ্টিৰ পৰা প্ৰতিদ্বন্দ্বিতা কৰিব তেওঁ। এসময়ত কংগ্ৰেছৰ দুৰ্গ হিচাপে পৰিচিত গোলাঘাট সমষ্টিটো বৰ্তমান বিজেপি চৰকাৰৰ মন্ত্ৰী অজন্তা নেওগৰ হাতত। এনে পৰিপ্ৰেক্ষিতত ২০২৬ৰ নিৰ্বাচনত অজন্তা নেওগৰ বিৰুদ্ধে নিৰ্বাচনী যুঁজত অৱতীৰ্ণ হৈ গোলাঘাট সমষ্টিটো পুনৰ কংগ্ৰেছৰ হাতলৈ ঘূৰাই অনাৰ পৰিকল্পনা কৰিছে গৌৰৱ গগৈয়ে। দলৰ এক সূত্ৰ অনুসৰি, এই সমষ্টিটোত গৌৰৱ গগৈয়ে ৰাজনৈতিক কুচ-কাৱাজো আৰম্ভ কৰিছে।
ইফালে, ২৬ৰ নিৰ্বাচনত গৌৰৱ গগৈয়ে গোলাঘাটৰ পৰা প্ৰতিদ্বন্দিতা কৰিব নেকি বুলি দেওবাৰে সোধা সাংবাদিকৰ প্ৰশ্নৰ উত্তৰ দি কংগ্ৰেছৰ সাংসদগৰাকীয়ে কয়, “মোক লৈ বহু বাতৰি ওলাই থাকে৷ কেতিয়াবা মই নগাঁৱত, কেতিয়াবা যোৰহাটত নিৰ্বাচন খেলিম বুলি ওলায়৷ দলে য’তেই দিব মই তাতেই খেলিম৷ দলে যদি যোৰহাটত দিয়ে, যোৰহাটৰ পৰা খেলিম৷ যদি দলে জালুকবাৰীত দিয়ে, মই জালুকবাৰীৰ পৰা খেলিম৷”