স্মাৰ্ট মিটাৰৰ বিৰুদ্ধে সৰৱ হৈছে ৰাজ্যসভাৰ সাংসদ অজিত কুমাৰ ভূঞা৷ বুধবাৰে সামাজিৰ মাধ্যমত ক্ষোভ উজাৰি স্মাৰ্ট মিটাৰক বিজেপি চৰকাৰৰ দিন ডকাইটি বুলি আখ্যা দিয়ে সাংসদ ভূঞাই৷

ফেছবুকত তেওঁ লিখে,

স্মার্ট মিটাৰ। বিজেপি চৰকাৰৰ দিন ডকাইটিৰ আটাইতকৈ ডাঙৰ উদাহৰণ হৈছে স্মার্ট মিটাৰ। সাধাৰণ মানুহক এই স্মার্ট মিটাৰে লুটি পুটি নি:শেষ কৰি তুলিছে।

সমগ্র অসমত প্ৰায় ৭০ লাখ স্মার্ট মিটাৰ সংযোগৰ বিপৰীতে ইতিমধ্যেই সংযোগ দিয়া হৈছে ২৫ লাখ। কিন্তু আন ৰাজ্যসমূহৰ তথ্য চালে দেখা যায় যে স্মার্ট মিটাৰ সংযোগৰ ক্ষেত্রত ৰাজ্য চৰকাৰসমূহে দৃঢ় স্থিতি গ্ৰহণ কৰিছে। অৰ্থাৎ স্মার্ট মিটাৰৰ সংযোগৰ সিদ্ধান্ত মানি লোৱা নাই। কিছু কিছু ৰাজ্যত অলপ সংখ্যক সংযোগ হ’লেও অসমৰ দৰে ঘৰে ঘৰে ইমান ব্যাপক পৰ্যায়ত কোনো ৰাজ্যত স্মার্ট মিটাৰ সংযোগ হোৱা নাই। আনকি বিজেপি শাসিত ৰাজ্য গুজৰাট, উত্তৰ প্ৰদেশ, মহাৰাষ্ট্ৰটো হোৱা নাই। বিজু জনতা দল, তৃণমূল কংগ্রেছ আদি দলে নিজ নিজ শাসিত ৰাজ্যত স্মার্ট মিটাৰ সংযোগৰ আপত্তি কৰিছে।

কিন্তু প্রশ্নটো হ’ল অসমত কিয় হৈছে। সাধাৰণ ৰাইজৰ ইমান দুৰ্ভোগ স্বত্বেও স্মার্ট মিটাৰ সংযোগৰ ক্ষেত্ৰত অসম চৰকাৰ ইমান তৎপৰ হৈছে কিয়? ইতিমধ্যে তথ্যৰ পৰা এইটো গম পোৱা হৈছে যে স্মার্ট মিটাৰ সংযোগৰ নামত ৫ হাজাৰ কোটি ৰাজকোষৰ পৰা উলিয়াই দিয়া হৈছে। গতিকে যিসকল কোম্পানিয়ে স্মার্ট মিটাৰ সংযোগৰ ঠিকা লা’ভ কৰিছে সেইসমূহৰ লগত অসমৰ ডাঙৰ ৰাজনীতিবিদৰো কিবা হাত আছে নেকি? স্মার্ট মিটাৰৰ নামত সাধাৰণ মানুহৰ বিদ্যুৎ বিল আগতকৈ ২/৩ গুণ বেছি আহিছে। সাধাৰণ মানুহক ভাতে মাৰি কাৰ ষড়যন্ত্র আৰু পকেট গৰম হোৱাৰ স্বাৰ্থত অসমত প্ৰায় ৭০ লাখ স্মার্ট মিটাৰ সংযোগৰ ঠিকাৰ ব্যৱস্থা কৰা হৈছে সেইটো আজিৰ দিনত আটাইতকৈ ডাঙৰ বিষয়।