স্বাধীনতা দিৱসত অসমৰ ভিন্ন প্ৰান্তত আলফাৰ বোমা সংৰোপন সন্দৰ্ভত অসম আৰক্ষীয়ে ধাৰাবাহিকভাৱে অনুষ্ঠিত কৰিছে উচ্চস্তৰীয় বৈঠক। শনিবাৰে শিৱসাগৰত অনুষ্ঠিত বৈঠকৰ ২৪ ঘণ্টাৰ ভিতৰতে পুনৰ দেওবাৰে ডিব্ৰুগড়ত আন এখন উচ্চস্তৰীয় বৈঠক অনুষ্ঠিত কৰে অসম আৰক্ষীয়ে।

উজনি অসমৰ কেইবাখনো জিলাৰ আৰক্ষী অধীক্ষক উপস্থিত থাকে এই বৈঠকত। অসম আৰক্ষীৰ SDGP হৰমীত সিং, IGP পাৰ্থসাৰথি মহন্তৰ নেতৃত্বত অনুষ্ঠিত হৈছে এই বৈঠক। ডিব্ৰুগড়ৰ দৌলতসিং নেগী আৰক্ষী অতিথিশালাত অনুষ্ঠিত হৈছে এই বৈঠক। ডিব্ৰুগড়, তিনিচুকীয়া জিলাৰ আৰক্ষী অধীক্ষকৰ উপৰিও ধেমাজি আৰু শদিয়া জিলা আৰক্ষী অধীক্ষকেও এই বৈঠকত অংশ গ্ৰহণ কৰে।

উল্লেখ্য, নিষিদ্ধঘোষিত সংগঠন আলফা স্বাধীনে এইবাৰো অসমৰ জনসাধাৰণক স্বাধীনতা দিৱস বৰ্জনৰ আহ্বান জনাইছিল। এক ভিডিঅ’ বাৰ্তা যোগে আলফাৰ মুখ্য সেনাধ্যক্ষ পৰেশ বৰুৱাই ১৫ আগষ্টত সামৰিক প্ৰতিবাদ সাব্যস্ত কৰাৰ কথাও সদৰি কৰিছিল। সেই অনুসৰি অসমৰ গুৱাহাটী মহানগৰৰ লগতে ৰাজ্যৰ কুৰিৰো অধিক ঠাইত বোমা সংৰোপন কৰাৰ কথা ১৫ আগষ্টৰ দিনটোত জানিবলৈ দিয়ে। এই খবৰ বিয়পি পৰাৰ লগে লগে ৰাজ্যজুৰি সৃষ্টি হয় হাহাকাৰ পৰিস্থিতি।

অৱশ্যে আলফাই সংৰোপন কৰা এটা বোমাও নুফুটিল যদিও ৰাজ্যৰ গৃহ বিভাগৰ ব্যৰ্থতাৰ ওপৰত এক ডাঙৰ প্ৰশ্নবোধকৰ সৃষ্টি হয়। ইতিমধ্যে এই গোচৰৰ তদন্ত চলি থকাৰ সমান্তৰাকৈ অসম আৰক্ষীয়েও ব্যাপক তত্পৰতা প্ৰদৰ্শন কৰি অনুষ্ঠিত কৰিছে ইখনৰ পিছত সিখনকৈ বৈঠক।