Brahmaputra Times
ৰাজ্যৰ ৫ বিধানসভাত অনুষ্ঠিত হোৱা উপ- নিৰ্বাচনৰ প্ৰচাৰৰ আজি অন্তিম দিন। শেষৰটো দিনত প্ৰচাৰ চলাবলৈ সাজু হৈছে শাসক-বিৰোধী। ১৩ নৱেম্বৰত অনুষ্ঠিত হ’ব চামগুৰি, বিহালী, বঙাইগাঁও আৰু চিদলীত অনুষ্ঠিত হ’ব লগা উপ- নিৰ্বাচনৰ ভোটগ্ৰহণ। ইয়াৰ মাজতে নিৰ্বাচনী হিংসাই চুই গৈছে চামগুৰি বিধানসভা সমষ্টিত। সমষ্টিটোত কংগ্ৰেছ আৰু বিজেপি কৰ্মীৰ সংঘাতে ভয়াৱহ ৰূপ ধাৰণ কৰা পৰিলক্ষিত হয়।
চামগুৰিত নিৰ্বাচনী হিংসা প্ৰতিৰোধ কৰিবলৈ ব্যৰ্থ হোৱা বাবে নিৰ্বাচন আয়োগৰ নিৰ্দেশত ৰাজ্যৰ গৃহ বিভাগে দেওবাৰে নগাঁও জিলাৰ অতিৰিক্ত আৰক্ষী অধীক্ষক পাৰ্থ প্ৰতিম শইকীয়া আৰু কলিয়াবৰ মহকুমা আৰক্ষী বিষয়া ৰূপজ্যোতি দত্তক বদলি কৰে।
অতিৰিক্ত আৰক্ষী অধীক্ষকগৰাকীক কাৰ্বি আংলং লৈ বদলি আৰু তেওঁৰ স্থানত কাৰ্বি আংলঙৰ অতিৰিক্ত আৰক্ষী অধীক্ষক জয়ন্ত বৰুৱাক নিযুক্তি দিছে গৃহ বিভাগে। একেদৰে হোজাইৰ উপ- আৰক্ষী অধীক্ষক শ্যামন্ত শৰ্মাক কলিয়াবৰৰ নতুন মহকুমা আৰক্ষী বিষয়াৰ দায়িত্ব দিয়া হৈছে।
দেওবাৰেও চামগুৰিত কংগ্ৰেছ নেতা আমজাদ আলীৰ বাসগৃহত দুৰ্বৃত্তই আক্ৰমণ চলায়। চামগুৰিৰ বাসবাৰলিত থকা আমজাদৰ বাসগৃহলৈ দুৰ্বৃত্তই শিলাবৰ্ষণ কৰাৰ অভিযোগ উত্থাপন কৰিছে কংগ্ৰেছে।
আনহাতে এই নিৰ্বাচনী হিংসাৰ মাজতে সাংবাদিকক আক্ৰমণ কৰা তাহেৰুদ্দিন নামৰ এজন লোকক আৰক্ষীয়ে আটক কৰে। সোমবাৰে বিয়লি ৬-০০ বজাত ৫সমষ্টিৰ বিধানসভাৰ উপ- নিৰ্বাচনৰ নিৰ্বাচনী প্ৰচাৰ অন্ত পৰিব।
