ডিজিটেল ডেস্কঃ পূব আফ্ৰিকাৰ দেশ ছোমালিয়াৰ এখন জনপ্ৰিয় সাগৰ তীৰত শুকুৰবাৰে নিশা আত্মঘাটী সন্ত্ৰাসবাদীৰ আক্ৰমণত ৩২ জন লোক নিহত হোৱাৰ লগতে আন কেইবা ডজনো লোক আহত হোৱা বুলি ৰাষ্ট্ৰখনৰ প্ৰতিৰক্ষা বিভাগে সদৰী কৰিছে।

ছোমালিয়াৰ চৰকাৰী তথ্য অনুসৰি, শুকুৰবাৰে নিশা সাগৰ তীৰত উপস্থিত হোৱা লোকসকলৰ ওপৰত নিৰ্বিচাৰ গুলীবৰ্ষণ কৰে এজন আত্মঘাতী বোমাৰু আৰু আন ৫ জন বন্দুকধাৰী সন্ত্ৰাসবাদীয়ে। আৰক্ষীৰ মুখপাত্ৰ আব্দিফাতাহ আদন হাছানে সাংবাদিকক কয় যে এই আকস্মিক আক্ৰমণত ৩২ জনতকৈ অধিক সাধাৰণ নাগৰিক নিহত হয় আৰু আন কেইবা ডজন আহত হয়।

ইফালে ঘটনাৰ পিছতে আৰক্ষীয়ে বহু নাগৰীকক সাগৰ তীৰৰ পৰা সুকলমে উদ্ধাৰ কৰিবলৈ সক্ষম হয়। আৰক্ষীয়ে আক্ৰমণকাৰীক প্ৰতিহত কৰিবলৈ গুলীচালনা কৰাত পাঁচোজন বন্দুকধাৰী সন্ত্ৰাসবাদী নিহত হয়। ইফালে গাত বোমা পৰিধান কৰি অহা আনজন সন্ত্ৰাসবাদীয়ে সাগৰ তীৰতে আত্মঘাতী বিস্ফোৰণ ঘটায়।

স্থানীয় কৰ্তৃপক্ষই জনোৱা মতে, আক্ৰমণকাৰীসকল সন্ত্ৰাসবাদী সংগঠন আল-ছাবাবৰ সদস্য আছিল, যিয়ে ২০২২ চনলৈকে ছোমালিয়াৰ বিশাল অঞ্চল নিয়ন্ত্ৰণ কৰি আহিছিল। অৱশ্যে ২০২২ৰ চৰকাৰী প্ৰত্যাক্ৰমণৰ পিছত সন্ত্ৰাসবাদী সংগঠনটোৰ অস্তিত্ব ধূসৰ হৈ পৰিছে। সন্ত্ৰাসবাদী সংগঠনটোৱে এই আক্ৰমণৰ দায়িত্ব স্বীকাৰ কৰিছে।