Brahmaputra Times
আগন্তুক পঞ্চায়ত নিৰ্বাচনতো অক্ষুণ্ণ থাকিব অগপ-বিজেপিৰ মিত্ৰতা। আজি হাইলাকান্দিত এই ইংগিত দিলে অগপ সভাপতি অতুল বৰাই।
দুদিনীয়া বৰাক উপত্যকা ভ্ৰমণৰ দ্বিতীয় দিনা আজি হাইলাকান্দিত আহি উপস্থিত হয় ৰাজ্যৰ কৃষি, পশুপালন আৰু সীমান্ত উন্নয়ন বিভাগৰ মন্ত্ৰী তথা অসম গণ পৰিষদৰ কেন্দ্ৰীয় সভাপতি অতুল বৰা।
হাইলাকান্দিত উপস্থিত হৈ প্ৰথমে জিলা আয়ুক্ত কাৰ্যালয়ত জিলাৰ বিভিন্ন বিভাগৰ বিষয়া সকলৰ সৈতে এক সভাত মিলিত হয়।
পিছত জিলা বিজেপি কাৰ্যালয়ত বিজেপি আৰু অগপৰ সদস্য সকলৰ সৈতে মত বিনিময় কৰে অতুল বৰাই। ইপিনে, বিজেপি কাৰ্যালয়ৰ পৰা ওলাই আহি সংবাদ মাধ্যমৰ আগত প্ৰতিক্ৰিয়া ব্যক্ত কৰি তেওঁ কয়, ‘অগপ বৰ্তমানে ভাৰতীয় জনতা পাৰ্টিৰ নেতৃত্বত থকা মিত্ৰজোঁটৰ অংশ। আৰু পঞ্চায়ত নিৰ্বাচন লৈ দুই দলৰ নেতৃত্বৰ মাজতে আলোচনা চলি আছে ।
লগতে তেওঁ আজি হাইলাকান্দি জিলাৰ বিভিন্ন বিভাগৰ সৈতে হোৱা ৰিভিউ মিটিঙৰ বিস্তাৰিত তথ্যও দাঙি ধৰে।
