‘আছু’ৰ কাছাৰ জিলা সমিতিৰ আহ্বানত বুধবাৰে অসম সাহিত্য সভাৰ শিলচৰ শাখাৰ কাৰ্যালয় প্ৰেক্ষাগৃহত আয়োজিত এক সভাত এই অসম চুক্তিৰ ৬ নং দফাক সমৰ্থন কৰাৰ লগতে বৰাকৰ খিলঞ্জীয়া সকলৰ মাটি ভেটি,ভাষা, কৃষ্টি সংস্কৃতি সুৰক্ষাৰ স্বাৰ্থত বৰাকত ৬ নং দফা কাৰ্যকৰী কৰিবলৈ আছুৰ কেন্দ্ৰীয় সমিতিৰ জৰিয়তে চৰকাৰক দাবী জনায় সংগঠন কেইটাই।‌

সভাত বৰাক উপত্যকাৰ বিভিন্ন খিলঞ্জীয়া জনজাতি আৰু জনগোষ্ঠীক প্ৰতিনিধিত্ব কৰা সংগঠনৰ প্ৰতিনিধিয়ে অংশ গ্ৰহণ কৰি অসম চুক্তিৰ ৬ নং দফাক সমৰ্থন কৰে।‌ সভাৰ অন্তত: সৰ্ব সন্মতি ক্ৰমে সদৌ অসম ছাত্ৰ সন্থা (আছু)লৈ এখন পত্ৰ প্ৰেৰণ কৰা হয়। আছুৰ সভাপতিলৈ প্ৰেৰণ কৰা পত্ৰখনত অসমীয়া জনগোষ্ঠী, বৰাক উপত্যকাৰ বিভিন্ন খিলঞ্জীয়া জনজাতি আৰু জনগোষ্ঠীৰ সদস্যসকলৰ সুৰক্ষাৰ বাবে ৬ নং দফা কাৰ্যকৰী কৰাৰ দাবী জনোৱা হয়।‌

২০২০ চনৰ ১০ ফেব্ৰুৱাৰীত পোহৰলৈ অহা অসম চুক্তিৰ ৬ নং দফা ৰূপায়ণ সমিতিৰ প্ৰতিবেদনখন অসমৰ খিলঞ্জীয়া জনসাধাৰণৰ সুৰক্ষাৰ বাবে বহুদিনৰ পৰা চেষ্টা চলাই অহাৰ লগতে অসমৰ বিভিন্ন জনসংখ্যাৰ বৈচিত্ৰ্যপূৰ্ণ জনসংখ্যাৰ মাজত ভাৰসাম্য ৰক্ষা কৰা বুলিও সংগঠন কেইটাই মন্তব্য কৰে।

ৰাজ্যখনৰ বাবে এইটো এটা গুৰুত্বপূৰ্ণ পদক্ষেপ বুলি ষ্মাৰকত উল্লেখ কৰি সংগঠন কেইটাৰ নেতৃত্বই মন্তব্য যে বিগত সময়ত বৃহৎ পৰিসৰৰ অনিয়মিত প্ৰব্ৰজনে তেওঁলোকৰ অস্তিত্বৰ প্ৰতি ভয়াৱহ ভাবুকি কঢ়িয়াই আনিছিল, যাৰ ফলত অসমীয়া মানুহৰ সাংস্কৃতিক, সামাজিক আৰু ভাষিক পৰিচয়ৰ সুৰক্ষা আৰু সংৰক্ষণৰ প্ৰতি উদ্বেগ সৃষ্টি হৈছে।

কিন্তু সুখৰ খবৰ এয়ে‌ যে ন্যায়াধীশ বি.কে.শৰ্মাৰ নেতৃত্বত অসম চৰকাৰে প্ৰস্তুত কৰা প্ৰতিবেদনত পৰামৰ্শসমূহ কঠোৰভাৱে কাৰ্যকৰী কৰা হৈছে। বৰাক উপত্যকাত বসবাস কৰা খিলঞ্জীয়া জনগোষ্ঠী সমুহ সংখ্যা লঘু। কিন্তু তেওলোক ইয়াত যুগ যুগ ধৰি প্ৰজন্মৰ পিচত প্ৰজন্ম ধৰি বসতি স্থাপন কৰি আহিছে। এই লোকসকলে প্ৰত্যেকেই নিজস্ব সংস্কৃতি, পৰম্পৰা, ভাষা আৰু জীৱনশৈলীত অনন্য।

সংগঠন কেইটাৰ মতে, তেওঁলোকৰ সুৰক্ষা আৰু নিৰাপত্তা আছুৰ দৰে জাতীয় সংগঠনে শীৰ্ষ অগ্ৰাধিকাৰ দিব লাগে। সেয়েহে নিৰ্দ্বিধায় বৰাক উপত্যকাত অসম চুক্তিৰ ৬ নং দফা আখৰে আখৰে কাৰ্যকৰী কৰা হওক বুলি আছুৰ প্ৰতিড়আবেদন জনাইছে সংগঠন কেইটাৰ নেতৃত্বই।

যাতে বৰাক উপত্যকাৰ খিলঞ্জীয়া জনজাতি আৰু জনগোষ্ঠীয়ে এই ঐতিহাসিক চুক্তিৰ সুবিধা লাভ কৰিব পাৰে। সভাত কোচ ৰাজবংশী, ডিমাছা, চৰাই জনগোষ্ঠী, পাটনী জনগোষ্ঠী, কছাৰী মুছলিম,মনিপুৰী, ৰেঙকে ধৰি বিভিন্ন স্থানীয় জনগোষ্ঠীক প্ৰতিনিধিত্ব কৰা সংগঠনৰ প্ৰতিনিধি উপস্থিত থাকে। প্ৰেৰণ কৰা ষ্মাৰক পত্ৰত উপস্হিত খিলঞ্জীয়া প্ৰায় ১৯ টা সংগঠনৰ নেতৃত্বই স্বাক্ষৰ‌ কৰে।