আগন্তুক বিধানসভা উপ-নিৰ্বাচনৰ বাবে কংগ্ৰেছে চাৰিটা সমষ্টিৰ প্ৰাৰ্থীৰ নাম ঘোষণা কৰিছে ৷ পাঁচটা বিধানসভা সমষ্টিত উপ-নিৰ্বাচন অনুষ্ঠিত হ’ব যদিও এতিয়ালৈকে বিহালী সমষ্টিৰ প্ৰাৰ্থিত্বক লৈ একমতত উপনীত হ’ব পৰা নাই কংগ্ৰেছৰ লগতে বিৰোধী শিবিৰ ৷ প্ৰাৰ্থিত্ব ঘোষণা কৰা সমষ্টি কেইটা হৈছে চামগুৰি, ধলাই, ছিদলী আৰু বঙাইগাঁও ৷

চাৰিটা সমষ্টিৰ প্ৰাৰ্থীৰ নামৰ তালিকা দলৰ হাই কমাণ্ডলৈ প্ৰেৰণ কৰিছিল প্ৰদেশ কংগ্ৰেছে ৷ এই তালিকাৰ পৰা চাৰিজন প্ৰাৰ্থীৰ নাম চূড়ান্ত কৰি এক বিজ্ঞপ্তি প্ৰকাশ কৰিছে কংগ্ৰেছৰ শীৰ্ষ নেতৃত্বই ৷ সেই অনুসৰি চামগুৰিত সাংসদ ৰকিবুল হুছেইনৰ পুত্ৰ তাঞ্জিল হুছেইন, ছিদলীত সঞ্জীৱ ৱাৰ্লে, বঙাইগাঁৱত ব্ৰজেনজিৎ সিনহা আৰু ধলাইত ধ্ৰুৱজ্যোতি পুৰকায়স্থক প্ৰাৰ্থিত্ব প্ৰদান কৰিছে কংগ্ৰেছে ৷

উল্লেখ্য যে, ১৩ নবেম্বৰত দেশৰ ১৫ খন ৰাজ্যৰ ৪৮ টা বিধানসভা সমষ্টি আৰু দুটা লোকসভা সমষ্টিত অনুষ্ঠিত হব উপ-নিৰ্বাচন। মনোনয়ন পত্ৰ দাখিলৰ অন্তিম তাৰিখ ২৫ অক্টোবৰ। ইয়াৰ উপৰি মহাৰাষ্ট্ৰ আৰু ঝাৰখণ্ডতো ১৩ আৰু ২০ নৱেম্বৰত দুটা পৰ্যায়ত ভোটগ্ৰহণ অনুষ্ঠিত হ’ব । আনহাতে, ভোটগণনা হ’ব ২৩ নৱেম্বৰত।