ক্ষমতাৰ ৰাগীত উভতগোৰে নচা আৰক্ষী বিষয়া ভাৰ্গৱ বৰবৰাই ফাঁচী বজাৰত শ-শ লোকৰ সন্মুখত কটনৰ ছাত্ৰক প্ৰহাৰ কৰাৰ ঘটনাৰ চাঞ্চল্যৰ মাৰনৌযাওতেই এইবাৰ গুৱাহাটীত এজন এচিএছৰ কাণ্ডই চাঞ্চল্যৰ সৃষ্টি কৰিছে৷ মহানগৰীত ভঙাগড়ত মদৰ ৰাগীত মাতাল এচিএছ বিষয়াই তাণ্ডৱ সৃষ্টি কৰাত তীব্ৰ চাঞ্চল্যৰ সৃষ্টি হৈছে৷ এচিএছ দেৱাশিস বৰঠাকুৰৰ বিৰুদ্ধে উত্থাপন হৈছে গুৰুতৰ অভিযোগ৷ জানিব পৰা মতে, মদ্যপান কৰি অহা দেৱাশিস বৰঠাকুৰে ভঙাগড়ত ৰাজহুৱা স্থানত উদ্ভণ্ডালি কৰে৷ এএছ-০১-এফকে-১৩৯২ নম্বৰৰ মহিন্দ্ৰা এক্সইউভি বাহন মুখ্যপথত ৰখাই কাৰোৰে কথা শুনিবলৈ প্ৰয়াস কৰা নাছিল৷ দীৰ্ঘ সময় পথৰ মাজত বাহন ৰখাই থোৱাত অইন বাহনৰ চলাচল বন্ধ হৈ পৰিছিল। কৰ্তব্যৰত আৰক্ষীয়ে বাৰে বাৰে গাড়ী আতৰ কৰিবলৈ প্ৰয়াস কৰিছিল যদিও আৰক্ষীকহে ওলোচাই ধমক দিয়া বুলি স্থানীয় লোকে অভিযোগ আনিছে৷ মদৰ ৰাগীত মাতাল হৈ থকা বুলি সন্দেহ কৰা বিষয়াজনে আৰক্ষীকহে নীতিশিক্ষা দিয়াৰ অভিযোগ উঠিছে৷ অৱশেষত আটক কৰি ভঙাগড় আৰক্ষীয়ে থানালৈ নিয়া হয় দেৱাশিস বৰঠাকুৰক৷ স্বাস্থ্য পৰীক্ষা কৰোৱা হ’ব বুলি জানিব পৰা গৈছে৷ জানিব পাৰ মতে, কামৰূপ জিলাৰ ৰঙিয়াৰ ৰাজহ চক্ৰ বিষয়াৰ কাৰ্যালয়ৰ চক্ৰ বিষয়া দেৱাশিস বৰঠাকুৰ।