ভূটানৰ ১১৭ সংখ্যক ৰাষ্ট্ৰীয় দিৱস উদযাপন সমাৰোহত ৰাজ্যৰ মুখ্যমন্ত্রী ড৹ হিমন্ত বিশ্ব শৰ্মাৰ অংশগ্রহণ। ভাৰত-ভূটানৰ মাজত অতিৰিক্ত পথ ব্যৱস্থাৰ বাবে ৰাজ্য চৰকাৰে পূৰ্ণ সহযোগিতা আগবঢ়োৱাৰ প্ৰতিশ্ৰুতি অসমৰ মুখ্যমন্ত্রী হিমন্ত বিশ্ব শৰ্মাৰ। ৰয়েল ভূটান চৰকাৰৰ আমন্ত্রণমর্মে চাৰিদিনীয়া ভ্রমণসূচীৰে সম্প্রতি ভূটান ভ্রমণৰত মুখ্যমন্ত্রী ড৹ হিমন্ত বিশ্ব শর্মাই মঙলবাৰে ভ্ৰমণৰ দ্বিতীয়টো দিনত ভূটানৰ ৰজা জিগমে খেছাৰ নামগিয়াল ৱাংচুকক সাক্ষাৎ কৰি অসম-ভূটানৰ মাজত থকা ঐতিহ্যপূর্ণ সম্পর্কক অধিক সুদৃঢ়কৰণৰ ক্ষেত্রত এক গুৰুত্বপূর্ণ আলোচনাত মিলিত হয় ।

ভূটান আৰু ইয়াৰ নাগৰিকসকলৰ উন্নয়ন তথা আঞ্চলিক অর্থনৈতিক উন্নয়নৰ পৰিপ্ৰেক্ষিতত ভাৰত-ভূটানৰ সহযোগিতা বৃদ্ধিৰ ক্ষেত্রত এই আলোচনাত বিশেষভাৱে আলোকপাত কৰা হয় বুলি জনাইছে অসমৰ মুখ্যমন্ত্ৰীৰ কাৰ্যালয়ে। ৰাজ্যৰ মুখ্যমন্ত্রীগৰাকীয়ে মঙলবাৰে ভূটানৰ প্রধানমন্ত্রীৰ সৈতেও দুয়োখন ভূ-খণ্ডৰ পাৰস্পৰিক বিষয়সমূহৰ লগতে ভূটানৰ সৈতে বাণিজ্যিক অংশীদাৰিত্ব শক্তিশালী কৰাৰ বিষয়েও সৌহার্দ্যপূর্ণ অলোচনা কৰে ।

এই আলোচনাক লৈ মুখ্যমন্ত্রী ড৹ শৰ্মাই কয়, “ভূটান আৰু অসমৰ মাজত পূর্বৰে পৰা ৭ টা বাণিজ্যিক পথেৰে দুয়োখন ভূ-খণ্ডৰ মাজত যাতায়ত ব্যৱস্থা অব্যাহত আছে । অসম-ভূটান সীমান্তত বাণিজ্যিক আন্তঃগাঁথনি শক্তিশালী কৰাৰ লগতে ভূটানৰ ব্যৱসায়ীসকলৰ চাহিদা অনুসৰি দুয়োখন ভূ-খণ্ডৰ মাজত ব্যৱসায়-বাণিজ্য বৃদ্ধিৰ প্রতি লক্ষ্য ৰাখি অতিৰিক্ত পথৰ ব্যৱস্থাৰ বাবে ৰাজ্য চৰকাৰে পূর্ণ সহযোগিতা আগবঢ়াব ৷” তদুপৰি, অসম মালা প্রকল্পৰ অধীনত কোকৰাঝাৰ আৰু গেলেফুৰ মাজত পথ সংযোগ ব্যৱস্থা অধিক শক্তিশালীকৰণৰ ক্ষেত্ৰতো ব্যৱস্থা গ্রহণৰ বিষয়ে মুখ্যমন্ত্রীয়ে সদৰী কৰে ।