ভিছা, পাছপোৰ্টৰ কোনো প্ৰয়োজন নাই। মাত্ৰ ১৭৫৬ টকা ৪৪ পইছা দিয়ক আৰু ভাৰত বাংলাদেশ সীমান্ত পাৰ হওক। শুনি আচৰিত লাগিলেও এয়াই সত্য। বাংলাদেশৰ পৰা এনেকৈয়ে ভাৰতলৈ আহি আছে অবৈধ বাংলাদেশী। কাঁটা তাঁৰ, সীমান্ত আৰক্ষীৰ কোনো সমস্যা নাই! এজেণ্টে পাৰ কৰাই দিয়ে ভাৰত-বাংলা সীমান্ত।

শেহতীয়াকৈ ধুবুৰীত গ্ৰেপ্তাৰ হোৱা এগৰাকী বাংলাদেশী মহিলাই দিছে এই বিস্ফোৰক স্বীকাৰোক্তি। মহিলাগৰাকীৰ স্বীকাৰোক্তিতেই ওলাই পৰিছে ভাৰত বাংলাদেশ সীমান্তৰ সুৰক্ষা ব্যৱস্থাৰ আচল স্বৰূপ। খবৰ অনুসৰি ১৭ গৰাকী বাংলাদেশী নাগৰিকে অবৈধভাৱে ধুবুৰীত প্ৰৱেশ কৰিছে। যোগমায়া ঘাটৰ সমীপৰ পৰা আটক কৰা হৈছে অবৈধভাৱে অসমত প্ৰৱেশ কৰা এগৰাকী মহিলাক।  জেৰাৰ সময়ত মহিলাগৰাকীয়ে আৰক্ষীক দিয়া স্বীকাৰোক্তিয়ে এতিয়া উদঙাই দিছে আন্তঃৰাষ্ট্ৰীয় সীমান্তৰ সুৰক্ষা ব্যৱস্থাৰ ফোঁপোলা স্বৰূপ।

মহিলাগৰাকীৰ স্বীকাৰোক্তি অনুসৰি তেওঁ বাংলাদেশৰ ঢাকাৰ চাদপুৰৰ পৰা ভাৰতলৈ আহিছে। ২টা দালালে মহিলাগৰাকী আৰু তেওঁৰ স্বামীক বাংলাদেশৰ পৰা ভাৰতত প্ৰৱেশ কৰিবৰ বাবে সহায় কৰিছিল। এই ২ দালালৰ সহযোগতেই তেওঁলোকে প্ৰৱেশ কৰে ধুবুৰীত। তেওঁলোকক সহায় কৰা ২ দালালৰ এটা অসমৰ আৰু আনটো বাংলাদেশৰ। বাংলাদেশী মূল্যৰ ২৫০০ টাকাৰ বিনিময়ত ২ দালালে অসমত প্ৰৱেশৰ সুবিধা কৰি দিয়ে মহিলাগৰাকী আৰু তেওঁৰ স্বামীক। তেওঁলোকৰ লগতে মুঠ ১৭ টা অবৈধ বাংলাদেশীয়ে অসমত প্ৰৱেশ কৰিছে। এতিয়াও তেওঁলোকৰ সৈতে অবৈধভাৱে অসমত প্ৰৱেশ কৰা আন বাংলাদেশী নাগৰিক কেইটাক ধৰা পেলাবলৈ সক্ষম হোৱা নাই অসম আৰক্ষী। পলাতক অবৈধ বাংলাদেশী কেইটাৰ সন্ধানত অসম আৰক্ষীয়ে আৰম্ভ কৰিছে অভিযান।

মন কৰিবলগীয়া যে, ভাৰত তথা অসমলৈ বাংলাদেশৰ পৰা ঘটনা অনুপ্ৰৱজনক লৈ দশক দশক ধৰি আন্দোলন, আলোচনা আদি হৈ আহিছে। আনকি ২০১৪ চনৰ পূৰ্বে বিজেপি চৰকাৰ ক্ষমতালৈ অহাৰ পূৰ্বে অসমলৈ বাংলাদেশৰ পৰা অনুপ্ৰৱেশ ৰোধ কৰাৰ প্ৰতিশ্ৰুতিও প্ৰদান কৰিছিল। অসমলৈ আহি ১৬ মে’ৰ পাছত বাংলাদেশীয়ে তালি-টোপোলা বান্ধিব লাগিব বুলি দিয়া হুংকাৰ আজিও বহুতৰে কাণত বাজি আছে। গৃহমন্ত্ৰী অমিত শ্বাহেও ভাৰত-বাংলা সীমান্ত সম্পূৰ্ণৰূপে ছীল কৰাৰ প্ৰতিশ্ৰুতি দিছিল। কিন্তু এনে অনেক প্ৰতিশ্ৰুতি আজিও পূৰণ নহ’ল। যাৰ বাবে আজিও অসমলৈ বাংলাদেশৰ পৰা অবৈধ অনুপ্ৰৱেশ হৈয়েই আছে।