ডিজিটেল ডেস্কঃ  জল জীৱন আঁচনি বন্ধ কৰাৰ নিৰ্দেশনা জাৰি ৰাজ্যৰ জল জীৱন মিছন আঁচনিৰ সঞ্চালক কৈলাশ কাৰ্তিকৰ।ফলস্বৰূপে হঠাতে বন্ধ হ’ল জল জীৱন আঁচনি ৷ সঞ্চালকে জাৰি কৰা নিৰ্দেশ মৰ্মে শনিবাৰৰ পৰা কাৰ্যকৰী হোৱাকৈ এই অভিলাষী আঁচনিখন বন্ধ কৰা হৈছে ৷

জাননীখনত উল্লেখ কৰা হয় যে, নিৰ্ধাৰিত সময়ৰ ভিতৰত কাম সম্পূৰ্ণ নোহোৱা আৰু ঠিকাদাৰে নিৰ্মাণ কৰা সকলো পানী যোগান আঁচনিৰ কামৰ গুণগত মান তৃতীয় পক্ষৰ দ্বাৰা পৰীক্ষণৰ গাফিলতিৰ বাবেই এই কাম বন্ধৰ সিদ্ধান্ত লোৱা হৈছে ৷ জাননীখনত ঠিকাদাৰৰ নিৰ্মাণকাৰ্য তৃতীয় পক্ষৰ দ্বাৰা পৰিদৰ্শন আৰু দুৰ্বল তদাৰকী কথাও স্পষ্টৰূপে কোৱা হৈছে ৷

৩ অক্টোবৰত ৰাজ্যৰ জনস্বাস্থ্য কাৰিকৰী বিভাগৰ কাৰ্যবাহী অভিযন্তাসকলৰ লগত বিভাগীয় মন্ত্রী জয়ন্ত মল্লবৰুৱা, অতিৰিক্ত মুখ্য সচিব, জল জীৱন মিছনৰ পৰিচালন সঞ্চালক আদিৰ উপস্থিতিত গুৰুত্বপূৰ্ণ বৈঠক অনুষ্ঠিত হয় । এই বৈঠকৰ সিদ্ধান্ত অনুসৰিয়েই জে এম এমৰ নিৰ্মাণ কাৰ্য চলি থকা সকলো আঁচনিৰ কামেই সাময়িকভাবে বন্ধৰ নিৰ্দেশ দিয়ে।

এইখিনিতে উল্লেখ কৰা প্ৰয়োজন যে, বেচৰকাৰী তথ্য অনুসৰি ৰাজ্যৰ সহস্ৰাধিক ঠিকাদাৰে চৰকাৰৰ পৰা ১৩ হাজাৰ কোটিতকৈয়ো অধিক ধন লাভ কৰিবলগীয়া হৈ আছে। ইতিমধ্যে এই বিষয়টোত উচ্চ ন্যায়ালয়েও ঠিকাদাৰক কিয় ধন দিব পৰা নাই বুলি চৰকাৰক জবাবদিহি কৰিছিল। যাৰ ফলস্বৰূপে জল জীৱন আঁচনিৰ কাম সাময়িকভাৱে বন্ধৰ নিৰ্দেশ দিবলৈ বাধ্য হৈছে চৰকাৰ ।