সমগ্র ৰাজ্যৰ লগতে মাজুলীতো উলহ-মালহেৰে উদযাপন কৰা হৈছে কাতি বিহু। মাজুলীত কাতি বিহুক শাৰদীয় মুখ্য উৎসৱ হিচাপে গণ্য কৰা হয় । ৰাসোৎসৱ, পালনামৰ দৰেই কাতি বিহু মুখ্য উৎসৱ মাজুলীৰ । কাতি বিহু উপলক্ষে মাজুলীৰ বিশেষ আকৰ্ষণ হৈছে আকাশ বন্তি ।
ঐতিহ্য-পৰম্পৰা ৰক্ষা কৰি মাজুলীৰ আউনীআটী সত্ৰ, দক্ষিণপাট সত্ৰ, গড়মূৰ সত্ৰত আকাশ বন্তি প্ৰজ্জ্বলন কৰা হয় । বিগত বৰ্ষসমূহৰ দৰে এই বৰ্ষতো ঐতিহাসিক আউনীআটী সত্ৰত ৩৭১ বছৰীয়া পৰম্পৰাৰে কাতি বিহু উদযাপন কৰা হয় । সত্ৰৰ প্ৰতিষ্ঠা কালৰে পৰা চলি অহা এই পৰম্পৰা ৰক্ষা কৰি সত্ৰৰ কীৰ্তন ঘৰৰ নিচেই কাষতে ২১ যোৰা আকাশ বন্তি প্ৰজ্জ্বলন কৰে । গোটেই কাতি মাহটোতে এই ২১ জোৰা আকাশ বন্তি প্ৰজ্জ্বলিত হৈ থাকিব মাজুলীত ।
মাজুলীৰ গাঁওসমূহৰ লগতে সত্ৰ অনুষ্ঠান সমূহতো পৰম্পৰা অটুট ৰাখি বিহু উদযাপন কৰে। কাতি বিহু দিনাই মাজুলীৰ ঐতিহাসিক আউনীআটী সত্ৰৰ প্ৰতিষ্ঠা কালৰে পৰা ৩৭১ বছৰীয়া পৰম্পৰা ৰক্ষা কৰি সত্ৰাধিকাৰ প্ৰমুখ্যে বৈষ্ণৱ সকলে আজি ২১ যোৰা বন্তি প্ৰজ্বলন কৰি সত্ৰখনৰ বৈষ্ণৱৰ লগতে বিশ্ববাসীৰ সুখ-শান্তিৰ কামনা কৰে।
সেই উদ্দেশ্যে আজি কাতি বিহুৰ দিনা পুৱা গোবিন্দ মহাপ্ৰভুৰ ওচৰত পূজা-অৰ্চনাৰ পিছতেই বৈৰাগী নাম, বৰনাম,ভাগৱত পাঠ, গায়ন-বায়ন, প্ৰসংগ, পালনাম প্ৰসংগ আদি পৰম্পৰাগত নাম-কীৰ্ত্তন অনুষ্ঠিত হয়। ইয়াৰ পিছতে বিয়লি সত্ৰখনৰ বৈষ্ণৱৰ সকলে হিয়ানাম, দিহা নাম, নটুৱা নৃত্য, ওজাপালিৰে নামঘৰৰ চৌপাশ মুখৰিত কৰি সত্ৰাধিকাৰ ড° পীতাম্বৰ দেৱ গোস্বামী, ডেকা সত্ৰাধিকাৰৰ লগতে সত্ৰৰ বৈষ্ণৱ সকলে জয়ধ্বনি কৰি গায়ন-বায়ন, ঢোল-খোল, শংখ-ঘণ্টা,দবা-কাঁহ বজাই মূল নামঘৰৰ পৰা ওলাই আহি নামঘৰৰ সমীপৰ মুকলি আকাশৰ তলত বিশেষ ভাবে বাঁহৰ খুটাৰে নিৰ্মাণ কৰা আকাশ বন্তি থলিত প্ৰৱেশ কৰে।