বাংলাদেশত হিন্দু নিৰ্যাতনৰ বিৰুদ্ধে আজি কোকৰাঝাৰত বিশাল প্ৰতিবাদী সমদল বাহিৰ কৰে। লোক জাগৰণ মঞ্চৰ উদ্যোগত কোকৰাঝাৰ ডিএন হিম্মৎসিংকা বিদ্যালয়ৰ খেলপথাৰৰ পৰা আৰম্ভ হোৱা প্ৰতিবাদী সমদলটোৱে সদৰ চহৰ পৰিভ্ৰমণ কৰি জিলা আয়ুক্তৰ কাৰ্যালয়ত প্ৰতিবাদী সমদলৰ সামৰণি পেলায়।

বিশাল প্ৰতিবাদী সমদলত অংশগ্ৰহণ কৰি প্ৰতিবাদকাৰীসকলে হাতে হাতে সনাতনী পতাকা,বেনাৰ,ফেষ্টুন লৈ বিভিন্ন প্ৰতিবাদী শ্লোগানেৰে সদৰ চহৰৰ পৰিৱেশ উত্তাল কৰি তোলে। সমদলৰ অন্তত অসম ৰাজ্যিক আৰএচএচৰ সহকাৰী সম্পাদক পৰিতোষ ঘোষ আৰু উত্তৰ অসম প্ৰান্ত বৌদ্ধিক প্ৰমুখ ৰথেন্দ্ৰ সিংহাই যোৱা ৫ আগষ্টৰ পৰা বাংলাদেশত সনাতনী হিন্দুৰ ওপৰত মৌলবাদীৰ দ্বাৰা যি হিংসা,হত্যা, অত্যাচাৰ, নিপীড়ন সংঘটিত হৈছে তাক গৰিহণা প্ৰকাশ কৰিছে।

বাংলাদেশত থকা সনাতনী হিন্দুৰ মানৱ অধিকাৰ,ধৰ্মীয় অধিকাৰ,সামাজিক অধিকাৰ,ৰাজনৈতিক অধিকাৰ,অৰ্থনৈতিক অধিকাৰ সুনিশ্চিত কৰাৰ আহ্বান জনাই অন্তৱৰ্তীকালিন চৰকাৰৰ মুৰব্বী মহম্মদ ইউনিছক সকিয়াই দিয়ে।

তদুপৰি ইছলামিক জেহাদৰ বিৰুদ্ধে বিশ্ববাসীক একগোট হ’বলৈ আহ্বাই জনাইছে আৰএচএচৰ সহকাৰী সম্পাদক পৰিতোষ ঘোষ আৰু উত্তৰ অসম প্ৰান্ত বৌদ্ধিক প্ৰমুখ ৰথেন্দ্ৰ সিংহাই।সমদলৰ অন্তত জিলা আযুক্তৰ জৰিয়তে লোক জাগৰণ মঞ্চৰ কোকৰাঝাৰ জিলা সমিতিয়ে বাংলাদেশ অন্তৱৰ্তীকালীন চৰকাৰৰ মুখ্য উপদেষ্ঠা অধ্যাপক মহম্মদ ইউনিছ লৈ এক স্মাৰকপত্ৰও প্ৰেৰণ কৰে।

উল্লেখ্য যে সমদলৰ পূৰ্বে কোকৰাঝাৰ ডিএন হিম্মৎসিংকা বিদ্যালয়ৰ খেলপথাৰৰ লোক জাগৰণ মঞ্চই এক প্ৰতিবাদী সভাও অনুষ্ঠিত কৰে। প্ৰণিধানযোগ্য যে আজি ৰাষ্ট্ৰৰ প্ৰতিখন জিলা সদৰতে বাংলাদেশত হিন্দুসকলৰ ওপৰত হৈ থকা সাম্প্ৰদায়িক হিংসা, হত্যা, অত্যাচাৰ আৰু নিপীড়ণৰ প্ৰতিবাদত প্ৰতিবাদী কাৰ্যসূচী ৰূপায়িত হৈছে ।