ব্ৰিটিছ বিৰোধী অসমৰ স্বাধীনতা সেনানী, স্বাধীনতা সংগ্ৰামত কৈৱৰ্ত সমাজক প্ৰতিনিধিত্ব কৰা বীৰ যোদ্ধা তাপুক কৈৱৰ্তৰ আজি স্মৃতি দিৱস৷ আজি নগাঁও জিলাৰ পুৰণিগুডামত স্বাধীনতা সেনানীগৰাকীক স্মৰণ কৰে পুৰণিগুদাম নাগৰিক সভাই৷ পুৰণিগুদাম নাগৰিক সভাৰ উদ্যোগত পুৰণিগুদাম বালিজুৰিত পুৰণিগুদাম কবি সন্মিলনৰ সভাপতি নবীন কলিতাৰ সভাপতিত্বত অনুষ্ঠিত হয় স্মৃতি দিৱসৰ সভা৷ উদ্দেশ্য ব্যাখ্যা কৰে পুৰণিগুদাম নাগৰিক সভাৰ সম্পাদক চন্দন ফুকন, চাপানালা উচ্চতৰ মাধ্যমিক বিদ্যালয়ৰ অধ্যক্ষ পাৰুল গায়নে। স্মৃতি দিৱসৰ সভাত বিশিষ্ট অতিথি হিচাপে উপস্থিত থাকি ভাষণ প্ৰদান কৰে নগাঁও সাহিত্য সভাৰ কাৰ্যনিৰ্বাহক সদস্য কবি কবিন পাটৰ, বিশিষ্ট কবি কুমাৰ বিভূতি, পুৰণিগুদাম কবি সন্মিলনৰ কাৰ্যকৰী সভাপতি প্ৰফুল্ল বৰা, চামগুৰি সাহিত্য সভাৰ প্রাক্তন সম্পাদক অসীম বৰা, বিশিষ্ট লেখিকা গোলাঘাটৰ পৰশমণি শইকীয়া, সমাজকৰ্মী সৰ্বেশ্বৰ বৰা, শিশুবন্ধু দুলাল বৰা, যুৱনেতা ৰঞ্জিত বৰা, অসম জাতীয়তাবাদী যুৱ-ছাত্ৰ পৰিষদ, নগাঁও জিলা সমিতিৰ যুটীয়া সম্পাদক দিব্যজ্যোতি হাজৰিকা, পুৰণিগুদাম আঞ্চলিক সমিতিৰ সভাপতি প্ৰাণকৃষ্ণ ডেকাই বীৰজনাৰ বীৰত্বৰ কথা সোঁৱৰণ কৰে। স্মৃতিসভাত ৩০ আগষ্টৰ দিনটো বীৰত্বৰ দিন হিচাপে পালন কৰাৰ লগতে বীৰগৰাকীৰ এখন জীৱনী গ্ৰন্থ প্ৰকাশ কৰি উলিওৱাৰ এক সিদ্ধান্ত গ্ৰহণ কৰা হয় বুলি উদ্যোক্তাসকলে জানিবলৈ দিয়ে। পদক্ষেপক নগাঁও জিলা মুক্তিযুঁজাৰু সন্মিলনে আদৰণি জনায়। ভাৰত ত্যাগ আন্দোলনৰ পূৰ্বৱৰ্তী সময়ত নিচেই কোমল বয়সতে বুটি কোৰেৰে ইংৰাজ চাহাবৰ মূৰত প্ৰহাৰ কৰি আৰু মূৰৰ টুপি কাঢ়ি বিচাৰাধীন হোৱা আৰু সেই বিচাৰ প্ৰক্ৰিয়াৰ জৰিয়তে বৃটিছ সংসদৰ মজিয়া কপোঁৱা নগাঁও জিলাৰ পুৰণিগুদাম চলচলিৰ নিবাসী বীৰ যোদ্ধা তাপুক কৈৱৰ্তৰ বিষয়ে বহুল চৰ্চা হোৱা পৰিলক্ষিত নহয়৷