কৈশোৰ-শৈশৱৰ পৰাই গীত-নৃত্যৰ সাধনা কৰি ডাঙৰ হোৱা গুৱাহাটীৰ লাচিত নগৰৰ যুৱ নৃত্যশিল্পী নম্ৰতা দাসে খ্যাতি লাভ কৰিবলৈ সক্ষম হৈছে৷ বিভিন্ন মঞ্চত শাস্ত্রীয়, আধুনিক নৃত্য প্ৰদৰ্শন তথা প্ৰতিযোগিতাত অংশ লৈ উজ্বলি উঠা যুৱ নৃত্যশিল্পী নম্ৰতা দাসে তেওঁৰ কামৰ বাবে স্বীকৃতি লাভ কৰিছে৷ স্বীকৃতি প্ৰদান কৰিছে ইউ.এছ আৰ্ট গেলেৰীয়ে৷ গুৱাহাটীৰ লাচিত নগৰৰ কন্যা নম্ৰতাক ইউ.এছ আৰ্ট গেলেৰীয়ে অনুষ্ঠিত কৰা বঁটা প্ৰদান আৰু প্ৰদৰ্শনী অনুষ্ঠানত নেচনেল স্মাচিং টেলেণ্ট এৱাৰ্ড-২০২৪ প্ৰদান কৰিছে৷ গাম্ভীৰ্যপূৰ্ণ অনুষ্ঠানত নৃত্যশিল্পী নম্ৰতাক এই সন্মান প্ৰদান কৰা হৈছে৷ লাচিত নগৰৰ ৰাষ্ট্ৰীয় বঁটা প্ৰাপ্ত নৃত্য শিল্পী গণেশ চন্দ্ৰ দাস আৰু কৰবি দাসৰ কন্যা নম্ৰতা দাস৷ পিতৃ-মাতৃৰ তত্বাৱধানত সৰুৰে পৰা নৃত্যৰ সাধনা কৰা নম্ৰতাই অতি কম সময়ৰ ভিতৰতে জনপ্ৰিয়তা লাভ কৰিবলৈ সক্ষম হৈছে৷ ১৫ নৱেম্বৰত অসমত প্ৰথমবাৰ ইউ.এছ আৰ্ট গেলেৰীয়ে নেচনেল স্মাচিং টেলেণ্ট এৱাৰ্ড-২০২৪ অনুষ্ঠিত কৰিছিল৷ দেশৰ বিভিন্ন প্ৰান্তৰ শিল্পীয়ে অংশগ্ৰহণ কৰা বঁটা প্ৰদান আৰু প্ৰদৰ্শনী নলবাৰী মহাবিদ্যালয় প্ৰেক্ষাগৃহ গৃহত অনুষ্ঠিত হয়৷ ইউ.এছ আৰ্ট গেলেৰীৰ প্ৰতিষ্ঠাপক তথা মুখ্য কাৰ্যবাহী বিষয়া উপাসনা শৰ্মাৰ উদ্যোগত অনুষ্ঠিত গাম্ভীৰ্যপূৰ্ণ অনুষ্ঠানত নেচনেল স্মাচিং টেলেণ্ট এৱাৰ্ড প্ৰদান কৰা হয়৷ দেশৰ কেবাখনো ৰাজ্যৰ লগতে অসমৰ কেবাগৰাকী যুৱক-যুৱতীয়ে নিজ প্ৰতিভাৰে উজ্বলি উঠিবলৈ সক্ষম হৈছে৷ অনুষ্ঠানত মুখ্য অতিথি হিচাপে উপস্থিত আছিল শংকৰ ঘনশ্যাম দাস আন্দানি, নলবাৰীৰ জিলা আয়ুক্ত বৰ্ণালী ডেকা৷ সমগ্ৰ দেশৰ ১৫০গৰাকীতকৈ অধিক লোকে অংশ লৈছিল যদিও ৩১ প্ৰতিভাক বঁটাৰ বাবে বাছনি কৰা হয়৷ ইয়াৰ ভিতৰত অন্যতম আছিল নম্ৰতা দাস৷ নম্ৰতা দাসৰ নৃত্য প্ৰতিভাক ভূয়সী প্ৰশংসা কৰিছে অতিথিসকলে৷ নৃতকলাৰে জড়িত প্ৰতিভা চিনাক্ত কৰি উপযুক্ত মঞ্চ প্ৰদানৰ হেতুকে ইউ.এছ আৰ্ট গেলেৰীয়ে নেচনেল স্মাচিং টেলেণ্ট এৱাৰ্ড-২০২৪ অনুষ্ঠিত কৰা বুলি জানিবলৈ দিয়ে৷