ডিজিটেল ডেস্কঃ উজনি অসমত তৎপৰতা আৰম্ভ কৰিছে ৰাইজৰ দলে৷ দলটোৰ সভাপতি তথা শিৱসাগৰৰ বিধায়ক অখিল গগৈয়ে হাস্পতালৰ পৰা সুস্থ হৈ ওলায়েই দলটোক শক্তিশালী কৰিবলৈ উজনি অসমত অভিযান আৰম্ভ কৰিছে৷ যোৱা ২৭ছেপ্টম্বৰত বিধায়ক অখিল গগৈৰ উপস্থিতিত ডিব্ৰুগড়ত অনুষ্ঠিত হয় যোগদান কাৰ্যসূচী।

বৰবৰুৱাৰ চ্যুকাফা ভৱনত অনুষ্ঠিত যোগদান কাৰ্যসূচীত ডিব্ৰুগড় জিলাৰ বিভিন্ন প্ৰান্তৰ বিজেপি, কংগ্ৰেছ আৰু অগপৰ দুই শতাধিক সদস্যই দলটোত যোগদান কৰে। নতুনকৈ দলটোলৈ অহা নেতাসকলক ৰাইজৰ দলে একোখনকৈ ফুলাম গামোচাৰে আদৰণি জনায়৷ সভাপতি অখিল গগৈয়ে দললৈ নতুন সদস্য অহাত স্ফূৰ্তি কৰি কয় যে ডিব্ৰুগড় জিলাৰ ৬টা বিধানসভা সমষ্টিৰ ৫টা সমষ্টিত শাসক দলৰ বিধায়ক আছে৷

এটা সমষ্টিত অসম গণ পৰিষদৰ বিধায়ক আছে। তাৰ পাছতো ডিব্ৰুগড়ত ৰাইজৰ দলত যোগদান কৰিবলৈ ৰাইজ আগবাঢ়ি আহিছে। ৰাইজৰ দলক শক্তিশালী কৰি অসমত আঞ্চলিক ৰাজনৈতিক দলসমূহক শক্তিশালী কৰিব লাগিব। গগৈয়ে জোৰ দি কয় যে ২০২৬ চনত ৰাইজৰ দলক বাদ দি কোনো দলে চৰকাৰ গঠন কৰিব নোৱাৰে৷