বিজেপিক পৰাভূত কৰাৰ হুংকাৰ দি অহা অখিল গগৈ আৰু লুৰীণজ্যোতি গগৈক বিহালী আসনখন এৰি নিদি কংগ্ৰেছে নিজাববীয়াকৈ প্ৰাৰ্থী ঘোষণা কৰাত দুয়োনেতাৰ অসহায় অৱস্থাত ৰস পাইছে বিজেপি নেতাই৷ অসমত ভাঙোন অহাত বিজেপিৰ নেতাই বক্ৰোক্তি কৰা থকাৰ মাজতে এইবাৰ বিৰোধী মিত্ৰতাক আৰু লুৰীণজ্যোতি গগৈক আক্ৰমণৰ লক্ষ্য কৰি লয় মন্ত্ৰী ৰণজিৎ দাসে৷ কংগ্ৰেছৰ বিৰুদ্ধে সৰৱ থকা লুৰীণজ্যোতি গগৈ আৰু অখিল গগৈক কটাক্ষ কৰিলে মন্ত্ৰী ৰণজিৎ কুমাৰ দাসে মৰ্চা-টৰ্চা এইবোৰ সংবাদ মাধ্যমে জীয়াই ৰাখিছে বুলি কটুক্তি কৰিছে। কংগ্ৰেছক মিত্ৰতাৰ ধৰ্ম বিজেপিৰ পৰা শিকিবলৈ কোৱাত উত্তৰ দিবলগীয়া একো নাই বুলি কৈ মন্ত্ৰী দাসেকয় যে লুৰীণজ্যোতি গগৈয়ে ৰাজনীতিৰ অ-আ-ক-খ-ই জনা হোৱা নাই। আমি ২০০৪ চনৰ পৰা বিধায়ক হৈছো। আৱেগৰ ওপৰত ৰাজনীতি বৰ্তি নাথাকে। অসমত কেইবাটাও আৱেগৰ ওপৰত হোৱা দল আছে। আৱেগৰ ওপৰত হোৱা দল হৈছে সাগৰৰ ওপৰৰ ঢৌ। সাগৰৰ ওপৰৰ ঢৌ দেখিবলৈ সুন্দৰ৷ নিমিষতে আহে যেনেকৈ নিমিষতে মাৰো যায়। লুৰীণজ্যোতি গগৈক বিজেপিলৈ আহিলে আদৰণি জনাম বুলি উল্লেখ কৰি মন্ত্ৰী দাসে কয় যে লুৰীণেই নহয়, ৰাহুল গান্ধী, প্ৰিয়ংকা গান্ধীয়েও বিজেপিলৈ আহিলেও ল’ব লাগিব৷ আমি কেৱল বিজেপি কৰি থাকিলে নহ’ব। আনকো বিজেপি কৰাৰ সুযোগ দিব লাগিব। বিদেপিৰ ৬ জন বিধায়কৰে চৰকাৰ নহ’লহেতেন, হিমন্ত বিশ্ব শৰ্মাক অনা বাবে চৰকাৰ হৈছে। লগতে বঙাইগাঁৱত ৩০ হাজাৰ ভোটৰ ব্যৱধানত মিত্ৰজোঁটৰ প্ৰাৰ্থী জয়ী হ’ব বুলি দাবী কৰিছে মন্ত্ৰীগৰাকীয়ে৷