ৰাজ্যৰ ৰাজধানী গুৱাহাটী মহানগৰীত শীতৰ প্ৰকোপৰ মাজতে সংসাৰ চলোৱাৰ তাগিদাত প্ৰাণৰ সংশয় জন্মিব বুলিও জানিও মুকলি আকাশৰ তলত বহি পৰিছে কেইবা শ শিক্ষক৷ বিজেপি দলে ২০১৪ চনৰ পিছৰে পৰা প্ৰতিটো নিৰ্বাচনত ৰাজ্যৰ ভেন্সাৰ স্কুলসমূহ প্ৰাদেশীকৰণৰ প্ৰতিশ্ৰুতি দি আহিছে৷ বিজেপি চৰকাৰ গঠন কৰাৰ পিছতে শিক্ষকসকলৰ চাকৰি নিয়মীয়া হ’ব বুলি আশা কৰিছিল যদি বিজপিয়ে প্ৰতিশ্ৰুতি ভংগ কৰিছে৷ কেন্দ্ৰত তিনিবাৰ, ৰাজ্যত দুবাৰ চৰকাৰ গঠন কৰিও শিক্ষকসকলৰ চাকৰি নিয়মীয়া কৰাটো দূৰৰ কথা এতিয়া শিক্ষকৰ কথাই শুনিব নোখোজে বিজেপি চৰকাৰে৷ যাৰ ফলত আজিৰে পৰা গুৱাহাটীৰ চচলত আমৰণ অনশন আৰম্ভ কৰিছে শিক্ষকসকলে৷ সদৌ অসম অপ্ৰাদেশীকৃত শিক্ষক-কৰ্মচাৰী সন্থাই গুৱাহাটীৰ ভি.আইপি ৰোডৰ চচলত আৰম্ভ কৰিছে প্ৰতিবাদ৷ ২০১৭-১৮ চনৰ শিক্ষানুষ্ঠান প্ৰাদেশীকিকৰণ আইনৰ পূৰ্ণাংগ সংশোধন কৰি অৱশিষ্ট অপ্ৰাদেশীকৃত শিক্ষানুষ্ঠানসমূহ আৰু ২০১৩ আৰু ২০২১ চনত বঞ্চিত শিক্ষক-কৰ্মচাৰীসকলক প্ৰাকেশীকিকৰণৰ দাবীত গুৱাহাটীৰ চচলত আমৰণ অনশন আৰম্ভ কৰিছে৷ ৰাজ্যৰ বিভিন্ন প্ৰান্তৰ পৰা আজি পুৱাই চচলত উপস্থিত হোৱা শিক্ষকসকলে কেইবাটাও দাবী পূৰ্ণ নকৰা পৰ্যন্ত আমৰণ অনশন কাৰ্যসূচী কৰি যোৱাৰ হুংকাৰ দিছে৷ শিক্ষকসকলে দিনে-নিশাই ভোকে পিঁয়াহে অনশন কৰি যাব৷ শিক্ষকৰ লগতে শিক্ষয়িত্ৰীসকলেও দিনে-নিশা অনশন কৰি যাব৷ শিক্ষকসকলে যেতিয়ালৈ তেওঁলোকৰ সমস্যা সমাধন কৰা নহয় আৰু চৰকাৰে আলোচনাত নবহে তেতিয়ালৈ ভোকে-পিঁয়াহে আন্দোলন কৰি যাব বুলি ঘোষণা কৰিছে৷ ইফালে অসম প্ৰদেশ কংগ্ৰেছৰ মিডিয়া বিভাগৰ অধ্যক্ষ বেদব্ৰত বৰাই এক বিবৃতিত কয় যে অসমৰ শিক্ষাগুৰুসকলৰ সমস্যা সমাধানৰ ক্ষেত্ৰত এইখন চৰকাৰৰ কোনো আন্তৰিকতা নাই৷ শিক্ষকসকলৰ সমস্যা সমাধান কৰিব নোৱাৰিলে বিদ্যায়তনিক পৰিৱেশত নৈতিবাচক প্ৰভাৱ পৰে৷ অপ্ৰাদেশীকৃত বিদ্যালয়সমূহৰ সমস্যাসমূহ সামাধান কৰিবলৈ কংগ্ৰেছ দলে দাবী উত্থাপন কৰা বুলিও কয় বৰাই৷ যুৱ নেতা সুব্ৰত তালুকদাৰে আজি প্ৰতিবাদস্থলীত উপস্থিত থাকি ভেন্সাৰ স্কুলসমূহ আৰু ৰৈ যোৱা পদসমূহ প্রাদেশীকৰণৰ দাবী জনায়৷ তালুকদাৰে কয় যে শিক্ষানুষ্ঠান প্রাদেশীকৰণৰ দাবীত চচলত হাজাৰ হাজাৰ শিক্ষকে আমৰণ অনশন কৰিছে। চৰকাৰী অৱহেলাৰ কাৰণে শিক্ষকৰ দৰে সমাজৰ অংশয়ো চৰম ত্যাগৰ বাবে সাজু হ’বলৈ কুণ্ঠাবোধ কৰা নাই৷ অথচ চৰকাৰে উন্নয়নৰ ফুলজাৰি মাৰিবলৈ শেষ নকৰে। চৰম ধিক্কাৰ। অসম অনুসূচিত জাতি সংগ্ৰামী যুৱ পৰিষদৰ সভাপতি সঞ্জীৱ দাসে মানৱ সম্পদ গঢ়িৰ খনিকৰক হাড় কঁপোৱা জাৰত প্ৰতিবাদ কৰিবলৈ বাধ্য কৰাটো চৰম অন্যায় বুলি কয়৷ দাসে শিক্ষকৰ আমৰণ অনশনৰ সমৰ্ৰ্থন কৰি কয় যে পূৰ্বেৰ পৰা শিক্ষকতা কৰি থকা শিক্ষকসকলৰ চাকৰি শীঘ্ৰে নিয়মীয়াকৰণ কৰি শিক্ষকসকলৰ জীয়াই থকাৰ ব্যৱস্থা কৰিব দিব লাগে৷